我一直攏知影

囡仔額頭彼搭蜞〔khi5疤痕〕

雖然經過時間的添補

莫詳細看已經看無啥痕跡矣

毋拘，佇我心肝底

奚是一搭永遠抺未平的記號

只是我無疑悟 

會佇伊得卜考大學的即時陣

想卜共彼搭蜞添予平

彼个蜞

是囡仔拄學會曉行路無偌久

有一暗

我佇灶跤洗碗，囡仔阿爸佇後間仔做空課

伊家己佇客廳耍

阮兜客廳參灶跤無隔間

伊是一个乖囡仔

若有看著人，伊道肯家己耍

實在是我無細膩，無看著伊咧耍痱仔粉

伊講卜放尿，雄雄走唯浴間仔去

走甲樓梯跤的時，洿著痱仔粉的跤蹄仔煞趨倒

頭額仔準準準摃唯樓梯尖尖的角。

規面．全血

阮兩翁仔某攏舉拐仔

毋但袂曉抱伊去坐車

連止血嘛愛囡仔家己來

伊愈哭、血愈流

叫伊家己提衛生紙掩孔喙、毋通哭

行出來外口坐車載伊去病院

阮知影到病院需要人共伊抱

一向無想卜麻煩人的阮

為著囡仔阮請厝邊幫忙阮

厝邊陪阮帶伊去病院紩孔喙

孔喙那紩、囡仔那哀、怹阿爸徛佇邊仔流目屎

見骨的孔喙，像割著我的心肝赫呢疼

內內外外紩十針

庄跤所在小病院，紩的手路無幼秀

拄開始時，囡仔的額頭像一支蜈蚣歇佇遐。

囡仔那大漢，彼搭蜞的色那來那淺

蜈蚣變做像自然的頭額痕

國小的時

卜帶伊去台北共蜞處理掉

囡仔講毋免，伊無感覺有啥毋好

伊國中時

講有同學笑伊是刀疤老大

閣共講咱來去共蜞美容

伊嘛是講免，因為伊共同學講

：「這是我以早行踏烏社會的記號啦．．．哈！哈！」

看伊會當講笑處理即層代誌

阮心肝內對伊的虧欠減少一寡寡仔

即馬當卜選讀大學學校的伊

煞共阮講：想卜去共額頭的蜞用掉．．．

問伊是按怎

伊聽講有一寡大學科系無卜收面容有大搭疤痕的學生．．．．

敢真的？

伊講是聽講

啊若彼款學校袂讀亦罷．．。

啊！阮敢是一向教囡仔講

外表的好痞無要緊、內才較重要？

無的確，奚只是自我安慰的話爾爾啦！

阮決定等伊考試煞

予伊去除掉彼畷十幾年的傷痕

希望經過美容了後

囡仔會袂記得彼擺的疼

我知影

道算無看著痕跡矣

每遍想起．．．

做伊父母的阮

佇囡仔受傷的時

無法度減少伊的疼、無法度減輕伊的驚

我心肝猶原會一擺閣一擺

痛疼！

＊歌曲來自網路＊