「阿母．．．．阿母．．．．」

鹿仔囝的聲音愈來愈細聲，可憐的鹿仔囝，又擱枵、又擱悿，即馬，怹干礁會當共怹的頭殼趴佇塗跤，細細聲叫著心愛的阿母，一聲一聲叫無停。啊！鹿仔囝即咧時陣連目睭攏剝袂開，怹欲去夢中走揣阿母，是啊，怹一定是佇夢中享受著一頓上香甜可口的奶水！汝看，怹睏去的時陣，喙舌伸出來外口舐一咧舐一咧，像佇夢中嗍著阿母的奶水赫款的滿足！

鹿仔母的跤，佇咧落落去陷阱的時陣，道已經受傷矣，所以，牠愈走愈慢，夠尾矣，干礁會當拖著足疼足疼受傷的跤，慢慢仔行唯伊的厝轉去；毋拘，時間實在太寶貴矣，鹿仔母的跤步一時仔道毋甘停一下，又閣跤步踏緊，那走、那行。

第二工透早，草仔枝、樹仔葉、花蕊頂頭，歇滿昨暝唯天頂落落來安慰鹿仔囝的露水，停佇松樹尖尖的葉尾頂懸的，像一粒一粒碎鑽石迄一樣的目屎滴落土跤的時，鹿仔母總算是轉來夠樹林內的厝囉！

「乖囝．．．乖囝．．．」

鹿仔母輕聲叫著伊的心肝仔囝，輕輕仔共怹叫精神

「阿母．．．阿母．」鹿仔囝誠歡喜叫著怹阿母，隨倚去怹阿母的腹肚遐，嗍著阿母透著厚厚恩情的奶水。

飼奶的時，鹿仔母輕輕用喙塊共鹿仔囝洗身軀，鹿仔母的目屎，嘛親像珍珠打斷線迄一般，一粒一粒落佇兩隻鹿仔囝的尻脊骿，珍珠佇鹿仔囝的尻脊骿頂頭，碎去矣！奚敢毋是阿母碎糊糊的心肝！

鹿仔囝戇戇仔咧食奶，怹毋知影鹿仔母即擺可能是上落尾一擺共怹洗身軀矣，犯勢嘛是母仔囝永別的儀式。