的確是老矣

睏眠的品質真痞

昨暗拄睏去一時仔

雄雄驚醒

感覺囡仔閣佇樓跤無起來房間睏

大大聲共喊唯樓跤去：「昌～汝閣毋睏咧創啥？」

：「我咧睏矣啊！」聲音唯伊房間傳出來。

啊！三更半暝呢，我咧老番顛！

閣來，就睏未去矣。

早起十點外仔

空課無閒一個坎站

睏袂好勢愛睏神的觸纏

提茶米茶來共伊趕走

茶拄泡好

才燒燒仔啉頭一喙

手機仔浮出阮翁來電話的信號

：「喂！我的車椆佇高速公路，共汝講一聲！」

我一時反應袂來

：「佇高速公路、車袂行、人咧．．．．」

伊講卜緊聯絡拖吊場，電話道掛掉矣。

毋知伊會落車囥三角架仔否？

毋知會甲車停較路邊咧否？

毋知拖吊場有聯絡著否？

．．．．．．

電話閣卡予伊

「嘟！嘟！嘟！嘟！」未通．．．．

電話閣卡予伊

：「請接語音信箱．．．．」

電話閣卡予伊

伊總算接起來矣：「汝莫煩惱啦，我椆佇橋頂車足濟的，痞落車啦．．．！」

是啊，舉拐仔的阮

若卜落車，道愛甲車門開甲開開開

佇電話中聽著一台一台咻咻叫路過的車聲

卜那有空間予伊落車咧？

時間一分一秒若拖著大粒石頭彼爾僫行

足想卜閣卡電話問伊．．．．

同事講：即個時陣莫閣共伊吵，予伊冷靜處理！

雖然誠替伊的安全擔憂，我干單會凍耐心等待。

倚十一點半

總算等著伊的電話：「汝來修理廠載我轉去！」

緊張的心情解除，換貯淀著感謝的一粒心！

阮知影

平安二字

毋是理所當然．．．

感謝天！感謝天！

：「車的水箱破去、引擎縮去

上少愛開咧三、四萬箍．．。」

勤儉的伊，毋甘搐搐安呢共我講。

我講：「敢有啥乜並汝平安轉來閣較重要？」

平安無價，敢毋是？

2006.11.07