頂日仔定定咧拭目鏡、洗目鏡，因為定看著目睭前一點烏影，掠準是目鏡洿著垃圾，尾矣則發覺是目睭的問題，是人講的「飛蠓仔症」。應該毋是啥乜大症頭。

最近參囡仔講起即咧現象，伊厚操，建議我去揣醫生檢查看咧。

拖幾何工無去看，囡仔又閣問起，伊知影我蠻皮，共我講：若袂行閣青盲，看汝卜安怎？！

予伊講一咧我家己煞有寡仔袂放心。

佇診療室，醫生檢查遮、檢查遐，共我講視力猶誠好、其他嘛無啥問題，若卜檢查「飛蠓仔症」，愛點一種「散瞳劑」的目藥水予尪仔仁散開，醫生則有法度檢查。

醫生講一般人「散瞳劑」點了等半點鐘道會使診斷矣，我煞等成點鐘則等著尪仔仁散開。

咧等的時，愛共目睭瞌瞌，若像是卜予我體會盲者的感受咧！

等我尪仔仁散開了後，醫生誠詳細檢查了講：「無啥問題，是自然的退化現象。免醫、嘛無藥醫。」啊！遮是天神送來第幾張通知阮已經老矣的批？敢會使共伊講：拒絕收件？！

人生的歲月慢慢仔飛走矣，雄雄飛入來一隻看有捎無的蠓仔！

醫生解說講：干單家己看會著、別人看袂著的現象．攏號做「飛蠓仔症」。

啊！若按呢講，頂工看的卡通，內底彼个一路毋道有致著真重症頭的「飛蠓仔症」嘍？因為伊看會著別人看袂著的「魔神仔」！

目睭點「散瞳劑」藥效作用了後，看著一片茫茫的白霧，敢有霧中的浪漫？無啦，是無方便。

原來，袂行閣青盲的無方便道是安呢啊。佳哉醫生講差不多四、五點鐘道會恢復正常的視力矣。毋拘，即咧時陣，煞愛去批價、提藥仔。成大斗六分院是舊建築的院區，動線無蓋順，批價佇遮、提藥仔佇遐，護士小姐看舉拐仔的我，即時閣無啥看，道講替我去批價佮提藥仔。有愛心的好護士，阮誠感謝！

佇到處欠缺無障礙設施的當今，一粒有愛的心，道是上好的無障礙設施！敢毋是？！