兩隻鹿仔囝下性命迮著怹阿母，規樹林攏是鹿仔囝的哭聲，雄雄，聲音煞斷去，原來兩隻鹿仔囝同齊去互樹仔根經著跋倒去，鹿仔母擱忍著伊受傷誠疼的跤，一跛一跛倒轉來，唚著鹿仔囝的身軀，目屎擱流落來講：「啊！我的乖囝啊，恁緊轉去啦，阿母佮扑獵的人昨昏已經約束好矣，今仔日一定愛趕轉去領死，我轉來是為著欲保全恁兩个幼芷的生命，即馬恁若是擱綴來，咁毋是無彩阿母的苦心咧，安呢夠尾矣，恁會佮阿母共款無性命啦，若是安呢，阿母會足傷心的啊！恁愛會記得，生命真短暫，世間的代誌是誠無常，萬般親情，落尾攏是愛離別的啊。阿母去了後，恁愛規心做一隻知影修行的鹿仔囝，到後世人的時，則有希望，則袂受輪迴擱來世間，做一隻逐工都咧受驚惶的動物！嗚．．．心肝仔囝啊，恁敢知影，恁敢知影？阿母道是頂世人貪愛的心傷過重，即世人則會出世做一隻動物啊。恁一定愛會記得：貪愛是所有痛苦的源頭，恁愛較早覺醒咧啊！」

鹿仔囝聽怹阿母安呢講，延路哭延路應講：「無愛啦！阿母，咱是安怎欲佮歹人講信義咧？怹欺騙汝、陷害汝、是安怎咱亦擱欲對怹講信用咧？亦擱有，汝講汝赫爾愛阮，又擱是安怎忍心放捒阮、甘願轉去送死咧？」

鹿仔母講：「咱若是沒講信用，即个世界誠緊道會毀滅，咱若是沒講信用，即个世界誠緊道會散了了，恁想看覓咧，準講世界道無去矣，天下間的阿母是欲安怎去疼惜伊的心肝仔寶貝咧？道是安呢，為著即个世界的希望，咱甘願予別人欺騙、嘛毋好去欺騙別人。阿母甘願為著講信用去送死，嘛無愛活佇欺騙人則會當活落去的世間。」

鹿仔母安呢講的時，唯伊的身軀發出著誠祥和的光影，迄款的光影，親像月娘的光赫爾仔溫柔。

鹿仔母講完，又擱含著目屎，斡頭緊走。

鹿仔囝無愛聽怹阿母講遐的話，擱佇鹿仔母的後背拚勢迮。

時間，已經得欲中晝時矣，日頭，照佇菩提樹頂懸，扑獵的人手摸著褲頭結咧迄支利箭箭的獵刀，徛佇菩提樹跤涼涼的所在，等候鹿仔母轉來。

無外久，鹿仔母己經出現佇遠遠的山坪遐。扑獵的人恬恬咧看鹿仔母一擺擱一擺斡頭，貼體咧安搭鹿仔囝，鹿仔囝一擺擱一擺拚命塊迮鹿仔母。

佇鹿仔母喘怦怦來到位佮扑獵的人講話的時陣，扑獵的人已經恬恬仔共迄支獵刀掞佇咧塗跤兜，目屎唯伊的面慢慢仔滴落來。

鹿仔母共扑獵的人磕頭講：「尊貴仁慈的大人啊，昨昏汝放我轉去，今仔日我照約束轉來。即馬，我的性命汝會駛得提去矣，毋拘，我哀求汝，我迄兩个囡仔，請汝一定愛放怹走。汝的大恩大德，我後世人一定會報答汝。」

扑獵的人感動甲雙手合十跪落來，對鹿仔母講：「汝一定毋但干礁是一隻鹿仔爾爾，汝一定是至高無上佛的化身，汝的慈悲，予人感動；汝的講信用，予我家己感覺真見笑。請汝轉去吧，我毋但無欲刣汝的囡仔，我嘛無欲刣汝，而且，唯即馬開始，我無欲擱刣任何一隻動物矣！」鹿仔母聽伊安呢講，緊參鹿仔囝同齊共扑獵的人磕頭說多謝，然後，一路唱著感恩的歌聲，唯樹林行轉去！