鹿仔囝食飽了後，鹿仔母誠悲傷共怹講：「乖囡仔，阿母欲共恁講世事無常的道理，準講恁若是知影即咧道理了後，後擺，若拄著甚乜突然的打擊，恁道袂傷過悲傷矣．．．．」

「阿母．．．阿母．．．甚乜是無常啊？」「乖囝，恁聽阿母講，天地間一切的現象，攏是變動的，攏是袂當永遠的、袂當控制的，這道是無常。恁看覓咧，天頂的雲，怹本來是東爿一簇、西爿一簇，毋拘，一陣風雄雄吹來，道予怹倚作夥，變成一簇雲鬥陣咧耍；無外久，另外一陣風透來，擱共怹吹散分開去，怹擱變作南爿一塊、北爿一塊的雲跡；世界上的一切恩情嘛是安呢，每一个阿母共怹心愛囝兒的關係，嘛是參一直咧變化的雲共款，尾矣總是愛離開的，奚毋是怹的阿母無愛擱疼惜伊的囝兒序細，實在是因為天下間的阿母，連家己攏無法度閃避無常的創治，則會無法度永遠照顧伊的囝兒序細啊！恁敢知影，佇即咧無常的世間，生命是偌呢阿軟弱啊，軟弱甲參一滴早起時的露水共款，日頭一咧照落來，露水誠緊道消失去安呢！」

鹿仔囝聽完，吵怹阿母講：「才無愛咧、才無愛咧，阮才無愛參阿母分開咧，阮欲佮阿母永遠作夥，阮愛阿母永遠疼惜阮！」鹿仔母聽得誠毋甘，擱想著愛趕緊教怹求生的本領，緊共怹講：「乖囝仔，行，即馬參阿母來去外口食一寡仔水草仔！」

鹿仔囝綴著鹿仔母，同齊唯有水聲的樹林行入去，無外久，道看著一條細條溪仔，溪仔岸兩爿生一寡仔水草仔，鹿仔囝學怹阿母食幾喙草仔，有影清芳擱甘甜，迄咧好氣味留佇喙內底，互兩隻鹿仔囝食甲足歡喜、足滿足的。

鹿仔母紲落講：「乖囡仔，愛會記得，恁後擺若卜出來食水草仔，愛儘量留踮溪仔邊兩爿道好，莫去樹林仔以外的所在，別位的草仔凡勢有恰濟，毋拘，別位有擱恰濟的危險佇遐等待咱。除了水草仔以外，會駛抾一寡樹頂落落來的花佮樹葉仔來食，唯樹仔頂落落來的水果，嘛是真好食的食物，會使加食寡。有時陣，雨落煞的時，佇樹仔跤遐嘛會當揣著一寡仔草菇，氣味誠甘甜。設使若佇寒人的時，樹仔、草仔攏蔫去，愛會記得，毋好去傷遠的所在揣物件食，佇遮齧一寡仔樹仔皮佮食一寡仔凋葉仔，亦是佇有水的所在，食一點仔石頭頂懸的青苔，忍耐一下，誠緊道會當過一冬寒人。總講一句，恁一定袂駛得為著欲貪食、愛耍走夠樹林外面去，則袂落落去迄寡扑獵的人做的陷阱內底，奚是咱安怎道無法度走閃的陷阱啊！」

鹿仔母舉頭看天頂，日頭己經唯山的後面行來夠懸懸的天中央矣，即咧時陣，鹿仔母目箍含著目屎講：「乖囡仔、乖囡仔，我的心肝囝，阿母即陣欲去一个足遠足遠的所在，唯今仔日開始，恁愛家已獨立過生活，愛家己照顧家己，予阿母放心．．．」鹿仔母則講煞，流著目屎拖著受傷的身軀遠遠走去矣，鹿仔囝怢一下仔，隨迮過去，喙內一直塊叫著：「阿母．．．．阿母．．汝莫走啊，阮無愛離開阿母啊．．．」鹿仔母聽落心肝內實在有夠痛疼，跤步踏慢，斡頭共鹿仔囝講：「嗚．．乖囝仔、我的心肝仔囝，恁毋倘擱迮來啊啦，走出去樹林外口，隨時有生命的危險恁咁知？昨昏，道是因為阿母貪著遐翠青的草仔埔，則落入去扑獵的人做的陷阱。恁敢知影，本來昨昏扑獵的人道欲共阿母刣死矣，毋拘，為著恁兩个乖囡仔，阿母一直甲扑獵的人哀求，伊則肯放我轉來，阿母卜教恁安怎揣食、生活，恁愛好好仔活落去，珍惜性命，阿母所有的艱苦，攏心甘情願．．．．」鹿仔母傷心講煞，隨擱拖著受傷的跤走去矣。鹿仔囝聽煞，驚一趒大聲悽慘喊著：「阿母───阿母────」

樹林的鳥隻聽著鹿仔囝悽慘的哭聲，嘛驚一下一隻一隻飛起來，樹林內底假若一聲擱一聲「阿母───阿母────」的迴聲塊咧遨袂停。