即工，鹿仔母欲教兩隻鹿仔囝一寡仔生存的步數，佇有風的時陣，鹿仔母就教怹共頭舉懸懸，鼻著透來的風帶來的氣味，判斷遠遠的所在，有啥乜動物咧活動。並且，伊佫教怹愛安怎保持警覺，不管時將一對耳仔展起來，幌幌咧，會當聽出來動物離怹有外遠。

逐擺鹿仔母若聽著附近雄雄有啥乜風吹草動的時，就隨時安靜落來，紲落[sua3 loh8接著]，誠緊甲身軀覆[phak4 趴]落來，甲頭覆佇土跤，一直等到赫的野獸親像一陣風安呢過去，則佫甲頭舉起來，聰明乖巧的鹿仔囝，誠緊著攏學會曉矣。

有一工，愛耍的鹿仔囝食飽了，爬起佇鹿仔母誠嫷的尻脊骿頂，兩个輪流咧耍溜滑梯的齣頭，紲落來，怹圍佇鹿仔母的身軀邊，汝走我迮、我走汝追覕相揣。鹿仔母看著囡仔的跤步，雖然佫有淡薄仔蹁來蹁去，毋過，心肝內已經感覺足安慰嘍！伊想講：囡仔逐工大漢甲有看著，恰辛苦嘛價值。

伊家己安呢甲家己講：「囡仔得欲會曉走矣，唯明仔再〔明天〕開始，我欲去溪仔墘的草仔埔遐，享受一頓仔腥臊的早頓，則佫去樹林內底揣一寡仔芳甜的草菇，我欲甲怹紮轉來，互囡仔嘛食即寡仔別項物件，安呢怹會恰緊大漢。」「而且，我欲教怹按怎躡跤尾來行路，按呢行路看起來，夆感覺赫爾高尚佫有氣質。我欲互怹行得像芭蕾舞者迄款的體態。」「佫恰要緊的，道是我欲教怹用上緊的速度下性命走．奚則是佇充滿危險的樹林內底上重要的求生本領。」

第二工透早，日頭的光鑽過樹葉樹枝，千萬條的光線．像一蕊一蕊無共款的日頭花仔輕柔潑落土跤的時，兩隻鹿仔囝享受阿母的奶水腹肚飽矣，鹿仔母共怹交代講：「乖囡仔，阿母腹肚枵矣，欲出去吃一寡仔草仔，則順紲揣一寡好食的物件，紮轉來互恁食。差不多日頭行夠天中央的時，我道會轉來，恁愛乖乖等阿母，千萬毋好四界亂走哦！」

鹿仔囝同齊應阿母講：「阿母，阿母，汝愛緊轉來啊，阮等汝轉來欲食晝哦！」

鹿仔母溫柔唯兩隻鹿仔囝的鼻仔輕輕唚一下，踏著輕快的跤步，行過重重疊疊，一埒佫一埒的樹林，來夠山坪頂懸。唯山坪頂懸看過去，是一遍翠青的草埔。草埔頂頭色彩艶麗的野花，像一葩佫一葩的火炎，佇濶濶濶的草埔頂頭燒起來赫爾光炎共款美麗，花蕊發出來互人強欲醉去的芳味。

詳細甲看；百百款的水果，佇樹仔頂發出金熠熠的光影，有蘋果、柑仔、柚仔、柳丁、桃仔、李仔、梨仔、棗仔、檨仔、芎蕉．．．哇！誠濟真芳先算道算袂了的水果。早起時的日頭，嘛親像一粒會發光的金蘋果．芳芳芳掛佇懸懸懸無雲的天頂。

哇！即呢奇巧的光景，遮敢毋是像神仙塊請人客迄款的腥臊，互人看得喙澖強欲流落來。毋拘，鹿仔母即咧時陣佫恰謹慎、佫恰細膩，因為伊知影，即遍四界看起來真嫷、鼻起來誠芳的草埔，是可惡打獵的人定定行踏的所在。怹來遮打獵，上愛掠的動物，道是像鹿仔母即爾嫷的斑鹿。怹共鹿仔肉賣互城裡的人食掉、共鹿仔皮賣互有錢人做作高級的地毯、啊那赫的鹿仔角咧？就盤轉賣夠中國，變做價數誠懸的藥材。