 
字體：小 中 大 |
|
|
|
| 2024/03/11 20:50:02瀏覽52｜回應0｜推薦4 | |
行過一、二十年鼻無芳臭的歲月，重新鼻著芳味，若像咧眠夢。 二十外年來，便若重新去揣一个新的醫生看鼻仔，攏會共講：只要閣予我鼻一遍菁仔花佮黃梔子花的芳味，就滿足矣。 最近去手術鼻仔。 會將鼻龍囥甲著舉刀來對待，是我無［病識感］。 這个症頭拄開始的時，暗時仔定定著坐起來喘氣，坐一時仔才閣睏，我彼時毋知影這是無正常的，掠準每一个人攏按呢。就像細漢時袂行，嘛毋知影這叫做跛跤，一直掠準大漢了後，就會當參阿姐、哥哥怹按呢行。
拄開始看醫生，是佇十外年前，有一遍阿母來斗六，我去參伊睏，睏前開講當中，我定定坐起來喘氣，身邊的姐妹仔共我講，按呢是鼻仔有問題，去予醫生看覓咧。 因為食西藥會愛睏，上班做工課驚無精神，毋敢揣西醫。 自彼時陣到今，附近鄉鎮的中醫診所，毋知換過幾个中醫師。攏講食看咧。 開始換診所食藥仔，鼻仔真正攏有得著改善，毋拘食一站仔，症頭又閣來矣。 一日閣一日向望藥方會當予我的鼻仔吸著空氣、鼻著芳味。 毋是無想過開刀治療，總是聽人講，就算開刀，嘛是會閣生出來。就按呢一直拖。 一直到舊年秋天，本來咧看的中醫診所，定定無車位通停車，輪椅欲入去的通道幾何台代步車停咧，出入有困難。 另外揣著一間停車場真闊、診所內底閣有無障礙便所的中醫診所，友善的空間、真理想。 醫生一聽著我講鼻仔袂通，家己用鏡看會著一粒若透明的物件。 伊連看都無看就講：這妳著去揣西醫開刀，食藥仔食袂行啦。 頭一遍聽著醫生遮呢直接的建議，心肝頭驚一下。 去揣斗六台大的廖醫師。 片仔照出來，就共我排開刀的時間。 一定著愛開刀hioh？ 醫生講，毋捌看過囥甲遮嚴重的，若閣繼續湠開，歹處理。 阮囡仔講，趁這馬猶有體力，去處理理咧。 我講毋拘聽講閣會復發。 阿勳講，過幾年仔快活喘氣的日子嘛好啊。 雖然按呢，嘛是閣咧躊躇。 因為轉來了後，食廖醫師開的藥仔，感覺喘氣淡薄仔有改善。而且雖然是西藥，食著嘛無愛睏。 我共醫生講這站仔食伊開的藥仔，有較好喘氣矣。敢會當先莫開刀、食藥仔治療就好。 醫師佇螢幕點出來予我看。 伊講：殕色的是鼻竇、烏色的是空間。妳看，鼻竇強欲共妳的鼻仔塞tīnn. 問醫師：若無處理會按怎？ 醫師特別講，這種體質，開刀成十年了後，有可能會閣復發。 十年？無要緊，彼時我應該是免用著鼻仔矣。 問醫生，有啥方法會當避免復發？ 伊講共鼻仔照顧予莫捷發炎，就會當避免。 我閣問，敢會使家己去開刀、蹛院？ 醫生笑笑講，上無開刀彼日嘛著愛有人…. 後來才知影，我想了siunn簡單。 佳哉有麻煩二姐來顧我。 開刀著去虎尾分院。 疫情了後，我毋敢用病院的輪椅。 所以，蹛院除了行李，閣著紮一台輪椅。 就訂一班復康巴士。 彼早起，車來矣，阿勳佇門口看我佮二姐上車。 運將參伊講耍笑：毋甘哦？你嘛上車啦！ 有聽著阿勳共二姐講，翠苓就拜託妳矣。 我知影伊加減仔會煩惱。 到病院頭一工抽幾何筒血，做真濟檢查。 彼下晡囡仔對台北坐高鐡來病院。我本成欲擋伊莫來，都拄轉來過年才去上班無幾日爾。 二姐講，無予伊轉來看一下、囡仔袂過心。 咱做過人的囝兒序細、我知影。 想講伊按呢走siunn-thiám（太累）。 陪伴一下晡，囡仔欲離開病院的時，雙手合十，共怹二姨講：媽媽就麻煩妳矣。 看伊行出病房的背影，毋甘予怹為我牽掛的心，淡薄仔酸。 人生行到遮，除了爸母、手足厚厚的疼愛，翁婿佮囡仔嘛攏遮用心，滿足矣。 倚窗仔的病床，看對外口出去，路樹點著閃熾的燈火，真媠！ 這暗、拄睏落眠就閣精神。這若是旅途中的窗仔景，感覺會閣較浪漫。 第2工被通知換手術房穿的衫的時，緊張的情緒總是予我想欲走便所，諴害。 病床予人捒去開刀房門口聽候，心情真複雜....希望莫hông捒入去、閣希望趕緊結束這个過程。 入去到開刀房，煞想欲放尿。想講若無講出來，驚仔手術過程會tshuā-jiō（尿失禁）歹看，想欲講，又閣毋知按怎開口。 落尾，提出勇氣共護理師講：歹勢、我想欲放尿。 怹知影我袂行，就提一个尿盆仔囥起來病床予我用。 眾人咧等、我煞放袂出來。一直共護理師講歹勢。伊講無要緊，足濟人攏會按呢。 哦...所以毋是我較káu-kuài（彆扭），就放心將手術前的tsi̍t-pû-jiō佇病床頂解決。 刀開了，才知影上艱苦的毋是開刀。 兩爿鼻仔攏塞咧。 一精神，我就共護理師講，袂當喘氣啦！ 伊應講：會啦！用喙喘氣。妳拄才就是按呢睏去的啊。 頭疼、嚨喉疼、袂當用鼻仔喘氣.... 開刀進前醫生有講用自費的材料，刀開了會較舒適。 我共醫生講，我驚疼，便若會當減輕疼的自費，我攏願意。哪會閣遮呢艱苦？ 護理師講頭疼是麻藥仔咧退、嚨喉疼是因為插過管。 若是痛苦有原因，咱只有是忍受。 恢復期，用喙喘氣的暗暝，睏攏袂去。 坐起來看天頂彼粒得欲圓的月娘，慢慢仔向西爿徙去。 月娘落落的方向，也就是日時高鐵人來客去的所在，高鐵站，原來也恬恬仔送別月娘。 睏袂去，打開手機仔聽內底合唱班上課時陣的錄音。 唱了好抑是毋好，這時陣已經無重要，聽著同學的歌聲，內底有溫度。 月娘佇同學的歌聲當中，沉落去矣。 應該講gâu-tsá（早安）。 但是我一暝無睏。 無睏的暝、真長。 同學的歌聲安慰著我..... 內心感謝教合唱的校長、佮協會的淑蘭，一直努力予［一團亂］活落去。 嘛予我佇快樂抑是失志的時，攏有歌聲陪伴。 嚨喉遮呢疼，敢閣會當為精彩的人生和聲？ 我無睏的暗暝，二姐比我較辛苦。 因為我用喙喘氣，嚨喉ta（乾）一直啉滾水。 滾水啉濟，就走便所。 病房內底的便所無方便輪椅使用，佳哉護理站較過遐，有一間無障礙廁所。 看二姐睏去，不忍心叫伊，家已欲徙輪椅，二姐一下就精神，我共講我會當家己去。伊用真嚴肅的口氣講：後擺莫閣講妳會當家己去，我一定會起來的。 暗時仔欲便所，總有一種講袂出來的［罪惡感］。 細漢時蹛的竹管仔厝，房間干但有尿桶，若是大便，欲去屎礐仔著經過三伯護龍、後壁埕二伯佮大伯怹兜，閣經過一落後壁宅仔，三間屎礐仔起佇宅仔尾，一路無燈火，暗so-so。 阮伊呀真巧，用一支竹仔編的糞斗貯火灰，予我坐佇房間的hōo-tīng（門檻），暗時仔使用的，這是阮阿娘發明的［無障礙廁所］。現代人飼貓，［貓砂］的概念敢是按呢來的？ 從我有記持以來，暗時仔屎尿這咧工課，攏是共二姐叫精神，伊就會替我去tshuân（張羅）火灰、去倒火灰。 二姐毋捌歹面予我看，毋拘一直到今，暗時仔欲便所猶閣會有一種麻煩著二姐、歹勢的情緒。 這幾暗攏按呢，一暝起來幾何擺，二姐綴我無睏。 開刀了，食物件毋但無味，連欲吞都有困難。 原來食物件著用著鼻仔，這是這馬才知影的代誌。 當禁食解除了後，有夠枵。 聽講餐廳有咧賣炒麵，二姐去買轉來，提予我食。我袂記得鼻仔袂通食大喙會吞袂落，大大喙食落，險仔嗆著。 鼻無芳味、食無鹹汫、吞袂大喙，食甲足辛苦。 佇這時陣，閣較好食的物仔，攏若像公廳âng-kè-toh（供桌）頂的牲禮。 出院了後轉來厝裡，鼻仔猶袂通，一入去睏眠內底，就閣去予［袂喘氣］叫精神。原來睏去我袂曉用喙喘氣。就算提愛睏藥仔來食，嘛睏無五分鐘，就閣精神。食第二粒愛睏藥仔的時，已經無作用矣，食了顛倒艱苦。 敢講鼻仔開刀攏著遮濟工無睏？我咧想，應該是我較歹育飼，我的肺臟咧等經過鼻仔的空氣。幾何擺心肝頭tsa̍t（悶）甲真艱苦，想講敢著來去急診？ 佳哉身體猶有才調擋落去。 鼻仔通彼暗，已經是手術了欲倚130點鐘。 第2早起，我睏甲日頭曝kha-tshng（屁股）。 囡仔敲電話問手術了按怎。 我講，感覺遮呢大港咧喘氣，足無彩的。一半就有夠用矣。 囡仔講，早就好去處理矣。 佳哉有聽怹的話，趁［少年］去處理，若無身體欲哪擋會牢恢復期的折磨？ 聽講割掉的鼻龍會閣倒轉來。 橫貫公路，一遍閣一遍崩山、工程人員一遍閣一遍入去清理土石流。 鼻仔、敢是空氣入去體內的橫貫公路....？
|
|
| ( 心情隨筆｜心靈 ) |
