字體：小 中 大 |
|
|
|
| 2023/02/20 19:32:49瀏覽395｜回應0｜推薦15 | |
看阿維用中型瓷仔茶罐仔泡茶，真理想，老人柴罐仔siunn細（太小），泡袂赴人啉。
才想起我若像嘛有一支這種的茶罐仔。
對田尾仔轉來，真正予我tshiau（找）出來這支茶罐仔，毋捌用過，猶新、新、新。這支茶罐仔是大同瓷仔，是阮伊呀買予我的嫁妝，佇我出嫁彼个年代，這應該是阮兜買過上蓋好的瓷仔。
從我出外去蹛學校，阮伊呀替我買的日用品，就攏揀上好的予我。
彼陣仔學校佇和美，聽人講遐海風大、天氣寒，伊呀去二姑丈遐拍兩領一人份的棉被，一領tshu（墊）、一領kah（蓋），驚我kah袂燒，kah的彼領交待著加重、加大。
寒人蓋著誠燒，是講定定予照顧阮的保育老師唸：妳棉被袂曉tsih（摺）像怹仝款嗎？
其實毋是袂曉，是比別人的較大領，按怎tsih嘛無法度參別人的仝款。
阮二姑丈拍的棉被真燒，幾何个宿舍的同學捌佇睏袂燒的寒夜，來參我kah這領棉被。怹攏講真燒、真好。兩人kheh做伙燒加燒。彼領棉被伴我佇仁愛渡過六年的秋冬，tsih起來比人較膨的棉被，嘛成做記持當中一个特殊的景。
以早我一直想無，伊呀哪著加開錢，買上好的物件予我？
一直等到家己做阿娘，等到家己的囡仔欲出外，咱咧替伊攢物件，才知影...原來囡仔欲離開咱身邊，是彼呢艱難的代誌。想欲用好的物件，來補內心空空彼个位。
佇家族群組ＰＯ出來我這支茶罐仔，寫講無紅線通縛罐仔蓋，驚弄破猶毋敢用，問阿維敢有紅線。
哥哥講伊遐有，拄好欲寄物件予阿維，才順紲寄。哥哥閣PＯ出來伊老人茶古的相片。哦～紅線辮甲成媠。
我共哥哥講，我袂曉辮，叫伊辮好才寄。
伊講著佇茶古頂頭辮，叫我先用、另工伊若來才替我辮。
阿維咧用彼个茶古，是以早爸母咧用的，爸母已經遙遠，阮對這支茶古牽出來一篇思念的心情。
|
|
| ( 心情隨筆｜心靈 ) |
