網路城邦
上一篇 回創作列表 下一篇   字體:
[台文版] 追、追、追.....環島夢.... (9)
2023/01/09 19:39:14瀏覽181|回應0|推薦3

出門旅行,逐工攏照計劃進行、萬事如意。彼是無可能的代誌,這馬想起來,困難會予咱加深旅途的記持,若像嘛毋是無好。

若無枵過頭,咱就毋知影這粒飯丸遮好食。

 

12/21

閣坐一遍貨車的升降機,才離開聖母廟香客大樓。

下一站目標是佇將近40公里遠的新營的太子宮。

遮呢遠的路程,照以早,補給車會綴佇阮後背,中途會揣一个所在歇一下、食點心、啉茶。

毋拘,總是有例外。

行足久、足久,攏無看著補給車綴過來。

聽著有人講咱行毋著路矣,規个人攏無力去矣,都咧遠矣閣行毋著路,真正是厝漏拄著透暝雨。

宋伯一句笑話就共心內的落雨暝變好天。

伊講:加這段路、無加收錢哦!

出外拄著袂順往往會,宋伯一句笑話予咱聽著笑出來,就閣有氣力通行落去。

宋伯一路騎車陪伴,拄著手搖車若有問題,伊總是誠緊就替阮排除困難,連行毋著路嘛會共拍結的心拍開。足有智慧的宋伯。

 

路閣較遠、行久嘛會到。提一粒可玉買的飯丸來食,夭壽好食,若像毋捌食過遮呢好食的飯丸。我共可玉講,咧枵的時一直想妳,妳耳孔敢有咧ngiau。伊講怹開車一路揣袂著阮,揣著的時,嘛已經欲到太子宮矣

 

太子宮附近蹛一位陶藝藝術家- -周美智。嘛是仁愛學校出來的,感覺仁愛出這位藝術家,阮嘛感覺光榮,總是攀緣共人講:伊是阮學妹。其實美智對仁愛學校畢業了後,繼續升學,閣去讀足濟冊、專心伊的藝術人生,忝為學姐,足歹勢!

手搖車佇伊室內,誠驚遮大台的手搖車無細膩共huê著伊辛苦創作的藝術品,毋敢四界參觀,是講干單頭前這間,就有夠吸引我矣。彼窗仔門,若像會當佇遐坐一下晡嘛看袂siān(倦)。

若舉枴仔起來行,就會當入去內底參觀矣。今、我柺仔是咧去便所用的爾,無體力通舉柺仔行較長的路。是貧惰、嘛是老矣。

 

離開新營,往二十外公里的朴子配天宮食中晝了後,離開朴子,閣行二、三十公里,最後一暗歇睏站- -客旅家嘉義國際青年旅館。

一般背包客會來蹛遮,一間房有頂、下舖,眠床誠清氣閣四序,閣有一間無障礙房,予阮洗身軀真利便。

若家己出外來遮蹛,會參生份人蹛仝房,應該是另外一種旅行的滋味。

真忝、早早就倒佇眠床,共床簾仔thuah起來,享受異鄉的最後一夜。

( 心情隨筆心靈 )
回應 推薦文章 列印 加入我的文摘
上一篇 回創作列表 下一篇

引用
引用網址:https://classic-blog.udn.com/article/trackback.jsp?uid=sann&aid=178053119