網路城邦
上一篇 回創作列表 下一篇   字體:
[台文版] 追、追、追.....環島夢.... (6)
2023/01/06 11:53:24瀏覽149|回應0|推薦2

愛無礙環島車隊佇東部繼續前進的影片佮相片,不管時PO佇群組佮粉專,東部的風景誠媠,路況嘛是上辛苦的一段,袂當參與,是上大的遺憾。

 想欲閣來去……

渡阮去坐火車的快樂馬車電力有限,欲去揣車隊袂當離火車頭siunn遠。上倚近火車頭的,是已來到枋寮矣,阮決定對枋寮一直綴轉來到雲林。

 12/18

斗六直接到枋寮的火車無幾班,時間袂拄好。有頂遍轉車的經驗,阮就敢去選時間較拄好的車班。

這幾工斗六真寒,阮無法度紮siunn重的行李,厚衫紮無幾領行李就強欲超重,欲出去幾何工,欲紮甲到是無可能,所以逐日攏愛洗衫才有夠通穿。

環隊車隊內底有一台大卡車,衫洗好會當吊佇頂頭,一工行程落來,衫嘛差不多凋矣。 

這遍蹛的所在,及格的無障礙設施大概無到一成,洗衫無問題,衫洗好欲提出去卡車晾,我是寸步難行。我攏麻煩年紀輕輕的志工御佳,拜託伊提去晾,到下一站住房的時,伊就共衫收落來,摺好好提來予我。因為阮無方便,所以隊裡的志工每一个攏誠無閒。御佳無論偌無閒,我若麻煩伊、伊攏應好,是一个真捌代誌、真有耐心的查仔囡仔。若共講多謝,伊攏講:啊無啥矣,這攏只是平時仔咧的代誌爾!

雖然知影出門拄著困難一定免不了,毋拘枋寮這間民宿,是我蹛過上蓋無方便的所在。

訂房的時有共講,阮是身障團體,需要出入方便。應講無問題,怹有電梯。咱若聽著有電梯,就放心矣。哪知影欲入門就有幾何个岑仔,只好對地下室出入,地下室的路崎度足恐怖,阮家己無才調出入,就閣辛苦著替阮捒車的志工朋友。 

這工入去到旅館,看著可玉因為中途跤受傷舉枴仔,跤腫腫khōng石膏(活動的),雖然佇群組知影伊受傷,猶繼續跟綴車隊、繼續替車隊訂房、訂餐等等真濟工課,親目看著伊的傷,猶是毋甘。問伊哪無愛轉去看醫生?伊笑笑講:袂疼,轉去才處理就好矣。

我甲伊講耍笑:無要緊啦,參阮比,妳是有期徒刑。阮是無期的。

其實我知影,雄雄受傷的人,比阮這自細漢就袂行的,閣較袂適應日常生活。感謝可玉,帶傷辛苦服務車隊。 

彼暝倒佇眠床,暗暗仔祈禱,紲落來幾何日的住房,希望莫閣踏著像[天氣晴]這款的地雷才好。

( 心情隨筆心靈 )
回應 推薦文章 列印 加入我的文摘
上一篇 回創作列表 下一篇

引用
引用網址:https://classic-blog.udn.com/article/trackback.jsp?uid=sann&aid=178037457