為著欲去參觀太平洋自行車博物館，車隊離阮會當家己去坐火車轉來斗六的火車頭，愈來愈遠。

除了早起時倚三十公里的行程，下晡著閣行六、七十公里才會到淡水。

12/08

早起搖車的路草，是行自行車專用道路，免參大車爭路，享受清氣、安靜的旅途，有一種幸福的感覺，煞袂記得長途搖車的thiám矣。平時仔對斗南到口湖，一工來回就thiám甲第2工著食酸疼的藥仔。這斗閣較長的路程，攏免食藥仔解疲勞。這應該就是運動的好處吧。

中畫到太平洋自行車博物館，聽博物館創辦人講腳踏車的故事。看起來tīng khok-khok（硬幫幫）、冷冰冰的鐵馬仔，聽講鐵馬仔被發明到今的種種，有溫暖、有趣味、嘛有辛苦。我愛聽故事，旅途中難得的課程。

感覺故事若欲講甲予人聽袂siān，講者人生經驗著真豐富。眼前這位講故事的老先生，人生的故事，參腳踏車發展的歷史分袂開彼款的精彩。

這工蹛瞑的旅館訂佇淡水，離遮大約猶有七、八十公里愛行。中晝食飽無偌久就起程。

路途遠，狀況煞袂少。

拄著封路袂當過，著重揣路。

拄著落雨。穿雨幔搖車真無好勢，北部的天氣愈來愈寒，袂當予身軀澹去。車隊停睏穿雨幔才閣行。

行海線，到八里的時已經黃昏矣。有去問渡船，渡船毋敢渡手搖車，若無坐渡船直接到淡水，會當省去十外公里的路程。

袂當坐渡船，就行關渡橋。

這是一段真困難的路段，關渡橋腳踏車車道毋若真崎，閣彎彎uat-uat，衝無偌遠車就倒退攄，佳哉志工隨倚來助力共阮捒。我咧想，閣較有力的人，手搖車應該無才調家己過這座橋。感謝陪伴阮，足辛苦的志工。

這段路困難甲無閒通翕相，淡薄仔可惜。

落關渡橋了後，閣向淡水直行。

離歇睏的商旅無甲兩公里遐，是我上班8年的事務所。聽著熟悉的落雨聲，毋敢回想少年時的往事，若無、這一暝就免睏矣。