2023.01.02寫

成十年前佇網路看著白沙屯媽祖潦溪的影片，內心像去予啥乜觸著，心心念念想欲親身去一遍白沙屯媽祖宮。一直攏是想想咧爾。

這遍，車隊搖到通霄的時，欲用無電力的方式，純然kōo手ká，對通霄慈后宮ká到白沙屯拱天宮。

12/06

騎快樂馬車去坐火車。

這遍出門才知影，對斗六直接到通霄的車班無濟，毋是siunn早就是siunn晏，若無就是無輪椅會當坐的車廂。學習坐轉車的車班。毋捌坐轉車的車班，開始足緊張，想講欲接落去坐彼班車時間毋知會赴否？毋知有仝月台否？到時敢有人會替咱提輪椅欲上車的渡枋仔？

佇彰化轉車，一落車，站務人員就來拍招呼，叫阮佇原月台等就好，車若來，怹會提渡枋仔予阮上車。

頭一關...遮呢簡單啊？我哪會共問題想共睏袂去？加煩惱的。

第2班車一路停睏真濟个月台，懸度已經參火車平懸，若是佇這種月台落車，輪椅就免麻煩站務人員提渡枋仔講。可惜，阮到位的通霄車站，月台猶袂升懸，阮猶是著麻煩人渡阮落車。

出車站兩點外爾，車隊按算4點會到位。

通霄車站附近無啥鬧熱，uat-kak（轉角）彼間85度c較有都市的味。

無偌久，連續來三、四个仝款欲等車隊的朋友，雖然互相無啥熟識，知影目標是仝款的方向，感覺誠好！

等車隊到位已經下晡4點外，日頭無力、風開始展威風。

對慈后宮到拱天宮成十公里，我的快樂馬車食電的，都抑感覺起崎有淡薄食力，這段路是愛無礙今年5月跟隨白沙屯媽進香的時，因為有人確診，為著進香隊伍其他人員安全設想，無行完。這工理事長純手搖、無用電、用虔誠的心來完成未了的路段，志工嘛有人落車用牽鐵馬仔行，黃昏透著冷冷的風閣起崎，真無好行。

到白沙屯食暗頓的時，看著理事長因為成十公里的出力，手、猶咧掣。伊對媽祖婆的虔敬的心，看著毋甘閣感佩。

我、總算親身來到白沙屯媽祖婆面頭前。彼種願望實現的感覺，毋是［歡喜］兩字會當形容的。

彼暝，蹛佇拱天宮香客大樓。

睏總舖，外口有無障礙浴間仔，真方便。

有人願望達成，嘛有人環島的夢佇白沙屯這站停睏。

有一个原本欲參加環島全程的伙伴，因為厝裡突然間有人身體出問題，不得已含著目屎佇這一工離開車隊轉去厝裡。有人問伊：是毋甘厝裡的人、抑是袂當繼續環島咧艱苦？

......毋知影這世間 有啥款的無奈

生命的意義 又擱有啥款的期待

天頂的月娘 保庇媽媽入夢來

陪阮唸歌 陪阮一暝到天光...... 媽祖的囡仔