網路城邦
上一篇 回創作列表 下一篇   字體:
[台文版] 追、追、追.....環島夢.... (5)
2023/01/05 10:24:08瀏覽116|回應0|推薦1

近鄉情怯,三十外年的歲月,將熟悉的街路,變生份。

12/9

透早,穿著雨幔,佇霎霎仔雨當中,坐快樂馬車去淡水捷運車頭。

昨暝咧擔心,路裡上班的車遐濟,阮這台細細隻仔的馬車是欲按怎參人kheh

真正是想siunn濟。

一路攏有腳踏車專用道,快樂馬車行佇頂頭,毋免煩惱路裡的車。

予我感覺誠意外,三公里外的路裡,無人共機車停佇車自行車車道,這佇三十外年前是無可能的代誌。社會真正有咧進步。

 

捷運列車對淡水起行,停睏的車站,大部份是以早鐵路淡水線的車站。經過幾何个車站停睏的時,攏有一種衝動,想欲落車,因為遮有我熟悉的人、事、物。

佇竹圍仔站附近,落車無偌遠,姐姐佮姐夫的厝佇遐。我若落車,阿姐會煮腥臊 予我食。以早姐夫佇士林開錶仔店,我佇淡水上班。拜六上半工彼个年代,拜六中晝下班我會直接去士林,因為彼陣仔阮姐姐的查仔囝,是一个世界古錐的囡仔,我定定拜六下晡共載轉來耍。阿姐會煮一頓予我食才予我轉來。阿姐煮食的手路,有夠讚。因為伊是大查仔囝訓練出來的嗎?

遮的往事,三十外年矣。古錐的囡仔變大人,嘛嫁去外國做澳洲人的新婦矣,為錶仔店無閒的姐夫佮阿姐,已經是退休的[老人]。定定參人出外去𨑨迌,雄雄走去揣怹、怹嘛無一定佇厝裡。是講,這毋是無去揣怹的重點,是因為雨咧落、阮快樂馬車像羊咩仔遐驚雨水。阮起起落落嘛足費氣。所以繼續予捷運列車載阮行。

 

車過關渡,埔頂屬淡水管轄。我外家厝就佇埔頂遐。佇淡水上班的時我就蹛遮,車站佇關渡屬台北市,我攏講我逐工對台北縣行去台北市坐車,才去台北縣上班。呵..干單想就足thiám。彼陣仔無感覺thiám,因為少年、因為有阿爸佮阿母佇咧。這馬這搭的外家已經變成虛空當中的一个名詞。人去樓空、樓tsua̋nn共賣掉。

 

車停忠義站,會記得這搭的忠義廟,足早就無咧燒金。以早定定愛來遮行行咧,內底空氣氣袂ak-tsak,除了拜拜,嘛是一个郊遊的好所在。

 

北投車頭後站看出去彼搭,就是我讀高商的學校- -十信。頂年仔聽講十信已經轉手予別人,學校的名嘛改矣。

讀冊彼陣仔,下課正確的路線是,出校門,倒斡行大路,踅對火車頭正門去坐火車;誠遠。

較近的路線是,出校門,正斡,hānn(跨)過鐵路,上月台等火車。

教官允准我行這个路線。(其實足濟老師嘛攏按呢行啊)

我行路足慢,定定到車頭的時,車起行,行正確路線的同學已經攏佇車內底共我ia̍t-tshiú(揮手),我干單會當等下一班車。就是按呢,行捷徑無一定較早到位。

彼當時,毋知影遮的景,會變成今仔日的往事。連學校的名都無去矣,閣有啥會當閣牢留咧?

 

石牌仔站是離北投上落尾一站。

讀高一的時厝裡佇石牌仔。坐火車去北投讀冊,是逐早起的戰鬥。因為上尾站,學生仔對台北收甲遮,車廂人tsa̍t-tsa̍t-tsa̍t(擠滿)

火車頭站務員定定共我講:你坐後一班。

我毋捌服從伊的指示。

因為後一班有可能閣較濟人。

若閣等落去,一定會遲到,逐工攏按呢起哩佮人khehkheh出來彼段學生仔時代歲月的鹹、酸、甜!

 

坐捷運去到台北火車頭。買著自強號的車票。

佇月台等車,想講自強號頂頭,去便所著用柺仔...

啊!我的柺仔,囥佇旅社樓跤袂記得紮轉來。

這个頭殼真正足奇怪,三、四十年前的種種記甲清清楚楚。昨暝枴仔囥佇樓跤的代誌,全然袂記得。

做一个資深的身障者,厝裡的枴仔幾何副。這副是アルミ(鋁)的較輕,較有咧用。

袂當全程追環島,柺仔替我往東部陪大家繼續行。

( 心情隨筆心靈 )
回應 推薦文章 列印 加入我的文摘
上一篇 回創作列表 下一篇

引用
引用網址:https://classic-blog.udn.com/article/trackback.jsp?uid=sann&aid=178033903