網路城邦
上一篇 回創作列表 下一篇   字體:
[台文版] 追、追、追.....環島夢.... (8)
2023/01/08 10:35:22瀏覽229|回應1|推薦6

旅行的奇妙,就藏佇未知內底。

這一工,有台文的雅氣、有外國人泡茶特別的氣味。遮个,就算咱已經佇旅途當中,嘛毋知影會拄著的代誌。

 12/20

離開四海一家,先去蓮池潭風景區看雙塔,若是蓮花開的季節,蓮花應該會比雙塔閣較媠。 

早起去高雄市身心障礙福利中心發物資,共手心反過來,送物資予弱勢,愛無礙協會平時仔就咧做的代誌,環島車隊沿路閣延續這層善事,拄好看著外口幼稚園的囡仔來遮,參障礙中心內底身心障礙的囡仔耍。

我以前佇專收行動無方便的特殊學校讀冊,歇睏日有時仔大學生會組團來參阮做伴、讀冊佮tshit-thô(遊戲)。來學校的大哥哥、大姐姐攏真會曉招呼阮。一般的同學攏真歡喜無聊的住校歲月,有人來鬧熱;毋拘,嘛看過一个學長,人客咧招呼伊,伊足歹聲嗽應人講:阮毋是動物園的猴啦、免恁來看。

因為有這个印象留佇頭殼內,所以我若是去較弱勢的團體,有一種驚驚的感覺,驚無小心去觸著人內心的脆弱。

 這日中晝佇台南十八卯茶屋食麵,誠特殊的口味,用餐當中,經營這間店的葉老師吟詩予阮聽。

台語詩、葉老師家己寫的。閣唸、閣唱,有夠精彩。參這間裝飾雅氣的店,足合味。

葉老師對地方的歷史、地理捌足深,透過伊的文筆寫出來的詩,我真合意。

後來看著老師的大名[葉東泰]。若無記毋著,開始學寫台文的時,定定看台文前輩寫的文章加強家己的台文能力,葉老師就是我學習的老師之一。感謝葉老師文學的肥料,豐富我台語文的養份。 

食晝的時,其中一桌的人客是外國人。食飽了後,葉老師介紹這位外國人,會泡咱台灣茶。請伊泡茶予阮啉。

這一站、幸福。有台語文、有外國人泡的茶。足想欲閣加歇一睏矣。

是講,這所離過暝的所在猶有一段路,中途閣有會去媽祖廟拜拜。所以較毋甘嘛著來起行。

 這暝蹛鹿耳門聖母廟香客大樓。

這間廟足闊,香客大樓嘛誠大間。但是又閣拄著無斜坡的樓梯岑仔。

這斗渡阮上樓梯的方式真特別。

隨隊一台貨車,後斗有升降機,共阮參輪椅徙起哩升降機,升懸,就起哩矣。有夠巧的方法。

就按呢,又閣渡過一關...感激不盡。


( 心情隨筆心靈 )
回應 推薦文章 列印 加入我的文摘
上一篇 回創作列表 下一篇

引用
引用網址:https://classic-blog.udn.com/article/trackback.jsp?uid=sann&aid=178048727

 回應文章

向陽春
等級:8
留言加入好友
2023/01/08 12:22
看到妳推廣台文的用心,給妳按個〝讚〞!讚啦
真正的台獨,是思考、發現台灣人民與土地的永續發展關係。也唯有當妳(你)用心思考、發現這種關係之後才能明白:妳(你)的未來在哪裡。
sann(33)翠苓(sann) 於 2023-01-09 19:31 回覆:
謝謝您