旅店外口有誠媠的海景。這應該是這間民宿上蓋OK的點矣。

聽講今仔日著愛行七十外公里。這个數字以早聽著會tshuah，這馬看起來若像無啥？

12/19 

對天氣晴民宿地下室bùn出來了後，坐起哩一台手搖車試騎。

慘矣、搖著真ân（緊），這是欲按怎應付今仔日的路程？

宋伯一再檢查，叫我閣試看咧。

欲試看會當衝起哩海景［我愛枋寮］彼个logo遐否。結果真食力。

附近平路閣試看咧...真正有問題。

工作人員建議我坐車。

坐佇車頂雖然免流汗、免出力，毋拘看著頭前的車隊，實在足想欲落去ká車。

是講為著團體前進的速度，我袂當固執我想欲挃的，就堅持欲ká彼台有問題的車。

佳哉參訪頭一站孝愛仁愛之家了後，明同哥就講有人欲共車讓予我，我講按呢歹勢呢。伊講袂啦，搖了十外工的勇士，到遮嘛thiám矣。就按呢我無客氣嘍。

佇仁愛之家阮唱歌、歕口琴予長輩聽。其中位坐佇頭前的阿伯，一聽著台語老歌的音樂聲，目屎就流落來。 

我毋知影伊有啥傷心（抑是感動）故事，但是想著我的阿爸，生命尾站彼幾個月仔佇護理之家的種種，不敢閣想落去；佳哉掛烏仁目鏡無人看著我目箍紅紅。 

我坐車入來仁愛之家，手搖車離開遐。ká著車，心情綴著輪仔的搖動，起飛、輕鬆起來，若像家己是一隻插翅的野馬。 

這工中晝頓佇國家三級古蹟，內埔天后宮用餐。

便若是古蹟，真罕呢會當做無障礙；這間天后宮嘛是。用枋仔渡輪椅去內底用餐。 

是講嘛是有例外的。像離內埔成十公里外的慈鳳宮，無障礙予人入去廟內底、閣入去內底的內底…有便所挺好用。便所是出門煩惱的代誌之一，我若舉枴仔坐式馬桶就可以，但是若坐輪椅，無障礙廁所，真無方便。搖車是一種真用力的運動，會定定想欲啉水。水啉了就欲揣便所。唉！真費氣。 

這暝，已經來到左營的四海一家。聽講以早是海軍的所在，房間內底的裝飾真有軍中的味。住房誠大間、眠床誠大頂，可惜曝衫猶是無方便。雄雄感覺，毋是曝衫無方便，是我行動無方便，離開熟悉的厝內，做啥乜攏無方便。閣著麻煩御佳替阮曝衫，干單會當講：誠多謝！