看著迎接車隊轉來雲林鬧熱的場面，毋知按怎，我想起來的，是長長的公路，志工陪騎的辛苦、大家拍拚向前行的一幕閣一幕。時常咱是一、二十公里恬恬仔行，其實內中有寂寞、嘛有孤單。

 12/22

佇客旅家樓跤食早頓的時，拄著一个韓國人來台灣旅行。理事長參伊交流。予伊知影愛無礙用手搖車環島轉來，看伊彼種感動的表情，咱嘛綴咧歡喜。

 離開客旅家了後，去參訪再耕園，是一个規模真大身障者庇護的所在。

便若看著庇護單位，我攏會按呢想，遮若加收一个身障者，就有一个家庭會得著安心。嘉基誠有心，會當支持遮呢大的再耕園一直行落去，替怹歡喜，是當地身障者的福氣。

車隊轉來到雲林，頭一站去大埤慈天必生宮，佇遐有真濟人來迎接車隊，理事長發表感想的時，講著：感謝所有的人、嘛感謝家己無放棄。

是啦，19工的環島，其中毋是辛苦兩字會當形容，著有偌大的勇氣、無放棄，才會當完成有風、有雨的這條路。

 食晝、歇睏了後，去斗南順天宮拜拜，佇廟埕看著一排重機，有夠奅（phānn 帥），重機嘛是我的夢，毋拘我知影，這就真正干單會當做夢爾。重機一路陪手搖車隊踅到車隊出發點- -斗六六房媽紅壇。

阮佇六房媽遐，換騎阮的快樂馬車，向厝裡直行。

內心紮著滿滿的感動，馬車載著重重的行李，一半是等待欲洗的衫。

 轉來到厝，快樂馬車佇走廊煞毋行。佳哉故障佇旅行的終點站，這一定是媽祖有保庇，若無車歹佇路裡，是一層足費氣的代誌。

想著這幾工追環島的種種，感謝愛無礙協會、感謝所有志工，予阮有機會踏入去夢中，雖然干單10工，無全程參與，夢、完成一半。

一半就誠滿足矣！