網路城邦
上一篇 回創作列表 下一篇   字體:
追、追、追.....環島夢..... (3)
2023/01/03 13:29:37瀏覽227|回應0|推薦7

本成來到白沙屯歇一暝,第2工就閣欲去坐火車轉來斗六。

理事長講閣來的行程有一站欲去新竹參觀腳踏車展覽,建議阮參觀了才離開。

厝裡兩隻貓仔飼料兩工份爾,驚加耍幾工矣轉來,看著的是[貓仔脯],麻煩阿維來斗六添飼料,阿維答應,阮就安心仔繼續耍落去。

12/07

快樂馬車予伊好命上隨隊的貨車繼續行,我開始兩工百外公里(對白沙屯到淡水)的手搖車,幸運抾著這段環島。

因為無準備這遍來白沙屯欲手搖車,所以無紮騎鐵馬專用的安全帽仔。

苗栗、新竹的風有夠強,幾何擺差一點仔共我鴨舌帽飛走去,佳哉攏捎有著,無法予飛去。

 

離開白沙屯了後行的彼段路,有夠長、有夠崎。應該有一、二十公里,我攏綴袂著頭前的車隊,離怹真遠。佳哉身邊攏有志工陪騎,看我下力搖車,伊講出來是欲放鬆,慢慢仔行。妳速度都二十外矣,是欲閣搖偌緊?

聽伊按呢講,就較放心,看袂著前車的尾脽就放怹去,怹總會佇一个所在等我。咧趕速度的時,毋是thiám,是搖車的雙手已經無感覺。

 

當地生命勵手搖車隊,接待阮去踅17公里海岸風景區,美麗的風景一幕一幕放伊過,驚閣離車隊siunn遠,毋敢定定停落來翕相。總是我曾經來過,這个美麗的海岸。我愛看海,以早轉去外家時,若無咧趕時間,我會買海線的火車票。有一遍賣票的人提醒我,進前有一班山線妳敢無愛坐?我講我欲看海。

這是我看海景上濟的一日。海湧真近,想欲聽海勇的聲,可惜去予風蓋過去,較聽就是風的聲。有風、才有湧?若像毋是。會記得少年時捌去淡水河邊夜遊,坐佇河邊,安安靜靜,海湧的聲唰~唰~唰~,有節奏、無停睏。

 

暗時蹛長和宮香客大樓。這間香客大樓足清氣,室內誠闊,參一般香客大樓比起來,有蹛飯店彼種四序的感覺,較可惜是入門有三个樓梯岑仔,對坐輪椅的阮,是真大的障礙。無別个方法,只有是麻煩志工幫忙。

一般蹛的房間真少有無障礙設備,洗身軀、便所,阮著想辦法。兩塊塑膠椅仔就是阮行入去便所的跤。出門,毋驚拄著困難,就驚無能力超越種種的障礙。

有志工的愛心幫忙,阮一關一關行過來。佳哉所有的困難,攏有克服的方法。這是行出來才知影的代誌。


( 心情隨筆心靈 )
回應 推薦文章 列印 加入我的文摘
上一篇 回創作列表 下一篇

引用
引用網址:https://classic-blog.udn.com/article/trackback.jsp?uid=sann&aid=178029078