這台機車從騎無偌久，三不五時矣就共我熄火。

昨昏揣另外一間車行處理，頭家真頂真，規台拆開看，了後閣騎出去試車。

這種改裝過的戰車，［正常人］一般是騎袂慣勢。

頭家騎出去足久的

坐佇店內等，手機仔罔pué

看著一个講座，報名時間拄偆無幾分鐘，資料添添咧送出去。

今仔日中晝食飽，款款咧，騎著快樂馬車欲去聽日本浮世繪與歌舞伎，拄出巷仔口過台3線，聽著一个聲，車就毋行，原來是皮帶斷去。敢是欲叫我莫拋拋走？

倒轉來，馬車予阿勳處理，我機車載輪椅，出門。

會想欲聽這場講座- -日本的浮世繪。

因為以早阮阿爸有咧看文藝春秋，佇彼本雜誌內底，看過浮世繪，人的表情，若像會當表達內心遐幼路。

凡若會當參阿爸連結的代誌，總是想欲去認捌。

場地佇雲科大的圖書館一樓。

佳哉換載輪椅出門，因為當我咧揣便所的時，工作人員帶我坐電梯，電梯細細隻仔，若是騎彼台手掛車頭的快樂馬車，無才調坐這台電梯。

會記得彼年為著安全，行徙開始欲坐輪椅的時，內心誠gāi-gio̍h（彆扭），若像全世界攏咧看咱，二姐共我講，人無遐閒啦，你舉枴仔佮坐輪椅人看著的攏仝款，莫想遐濟。

現代真濟所在攏真方便出入。像今仔日按呢，家己人坐輪椅出入，邊仔的人會問需要幫忙否，咱若講會使家己來，人對待咱就足自然，無像以早彼種過頭熱心的眼神。真合意這種感覺，咱參人仝款；只是穿無仝款的鞋仔爾爾。

雖然一般人看著阮，攏會真熱心欲幫忙，但是我閣較希望的是，環境無障礙。

頂工一个佇文化中心做志工的朋友提票予我，叫我去看節目。

重整理過的文化中心我抑毋捌去，問伊輪椅敢會使參人排隊同齊入去？

伊講袂當。著一點鐘進前，去請志工開邊仔的門予輪椅入去？

我講按呢票免、我無欲去！

伊講志工攏足願意幫忙。

我需要的毋是幫忙...是無障礙的場所。

想講，火車頭的月台若是會當像台北的捷運，直接予輪椅出入，上、落車免予工作人員舉一塊枋仔，按呢坐火車去旅行，會閣較自在。

khuè（架)彼塊枋仔，著麻煩人，閣會影響上、落車的旅客。

上車進前，著先去服務台登記，請怹通知我欲落車的車站，怹會準備枋仔予輪椅落車。所以中途若看著風景媠、想欲提早落車....應該是無枋仔通落車。

希望自由自在、出出入入攏免麻煩人的環境，佇我猶會當四界去的時，實現。

這个小小的心願、阮誠心向天祈求！！