2004年的春天台譯

遮是佇阮囡仔細漢時，我定定講予阮囡仔聽的故事。

學寫台文了後，感覺迹爾仔有感情的故事，譯作台文，的確會予人有閣較深的感動。

佇2004年時，我台譯了即篇故事。

故事有較長，分段貼出來．．．

凡勢盈暗汝揣無故事通共囡仔講的時，就用會著。

故事是安呢講：

古早古早，佇喜馬拉雅山的山跤，有一片翠青的樹林，樹林內底，有一隻又佫水、又佫仁慈的鹿仔母。伊佇山跤揣一位較偏僻的所在，將兩隻誠古錐的鹿仔囝生落來。

鹿仔囝的毛是烏透紅的，頂頭佫有一點一點若承〔sin5〕著落雪的白花點，怹有一對迷人的大目睭，親像怹阿母赫爾仔嫷。

兩隻鹿仔囝佇拄出世的時陣，兩蕊目睭亦佫展無啥會開、假若拄則佇眠夢內底精神共款，物件看袂清、東西南北分袂明。怹的腳腿軟弱無力，連徛〔khia7　站〕都徛袂起來。干礁會當蝹〔un1　癱〕佇土跤，過足久的，則會當桀[khiat8 掙扎]一寡力共頭舉起來，嗍〔suh4吸〕一喙仔阿母的奶水。這是一對赫爾仔軟弱的小生命、袂輸像早起時稻草尾溜的露水，袂堪得人細細力仔共伊挓〔tha3 撥弄〕一咧道落去共款的脆弱。

即幾工，鹿仔母恬恬仔佇遐，無吃、無啉嘛無睏，為著欲照顧即兩隻軟汫[ciann2 軟弱]的小生命，鹿仔母的身軀，一工比一工恰無力。兩隻鹿仔囝，倚佇鹿仔母的身軀邊，食飽睏、睏飽食，身軀一工比一工佫恰勇壯、佫恰健康。

最近即兩三工，鹿仔囝逐工跪佇鹿仔母的腹肚邊，佇咧享受阿母的奶水，遮的奶水參有鹿仔母的慈愛，親像露水赫爾甘甜。對即兩隻鹿仔囝來講，世界上無別項物件比這佫恰清芳、佫恰甘甜！

幾落工來，逐擺鹿仔母塊飼奶的時，伊道會將舌〔cih8〕伸出來，共鹿仔囝洗身軀。鹿仔囝佇即咧時陣，恬恬仔享受著阿母溫暖的愛。對即兩隻鹿仔囝來講，阿母柔軟溫暖的喙舌，比日頭伯阿恰溫暖，因為，日頭伯阿干礁會當溫暖怹的身軀，毋過，阿母的喙舌，溫暖夠怹的心肝內底。

鹿仔囝食飽矣、身軀亦洗好矣，鹿仔母道教怹講話。

暗頭仔卜睏進前，鹿仔母會真溫柔唱一首搖囝歌，來互鹿仔囝恰好落眠，伊是安呢唱：

「呦呦呦，呦呦呦，日頭落山囉；

呦呦呦，呦呦呦，月娘出來囉；

呦呦呦，呦呦呦，天星出來囉。

呦呦呦，呦呦呦，心肝仔囝睏去囉。」

就安呢，鹿仔囝誠緊道共目睭瞌瞌，慢慢仔去做一个誠甜的美夢矣。

鹿仔母講話的聲音，婉轉佫慈祥。鹿仔母唱出來的歌聲，溫暖閣好聽，鹿仔母的言語佮歌聲，予鹿仔囝的生命飽淀佫精彩！