最近定定思維「為母者強」即句話的含意。

阮囝歇熱了後升高三，連鞭道欲考大學矣。放學了後怹導師閣陪怹晚自習，到十一點外才有轉來到厝。

唯怹學校轉來阮厝有兩條路，一條是踅唯市區去、一條是唯庄內的農路轉來，農路較近，但是暗時仔無啥人，路燈閣細細葩仔無蓋光，交代囡仔若暗轉來，鐵馬仔踅唯市區的路轉來較安全。

一直掠準伊暗轉來是行市區彼條路。

有一暗真宴亦未轉來，袂放心出去揣伊，遠遠看伊唯庄內彼條農路轉來，問伊那會行遮？伊講真悿矣莫愛閣踅遠路，講伊敢行叫我免煩惱！

那有可能莫煩惱？做父母的心道是生來欲煩惱囡仔的敢毋是？

路裡飆車的少年仔、駛快車的醉客、鱸鰻鱸闖〔tshuànn囂張〕的tshit-thô仔，曠闊無人的暗路，社會治安的敗壞，逐項嘛予做老母的阮煩惱！

伊講伊大漢矣！

囡仔大漢矣，父母的心猶原是掛慮啊！敢毋是？

一擺阮姐妹仔轉外家tshit-thô，大姐唯外口入門，阿母叫伊淺拖仔緊穿咧較袂寒。

我共阿母講：「伊呀，人阿姐五十外歲人矣，汝閣共伊當做囡仔安呢叫伊緊穿淺拖仔？」

阿爸佇邊仔聽著應講：佇父母的心目內，囝，閣較大漢嘛是囡仔．．．

阮囝講伊大漢矣，我定共伊當做囡仔。即馬我會當體會阿爸講的彼句話矣！

自知影囡仔會行農路轉來了後，佇倚11點我道機車騎咧去等伊。

驚參伊相出路，所以我道順農路行唯怹學校的方向去。實在講，若毋是為著欲等囝，即款暗路我是絕對毋敢行。夜蟲的歌聲雖然浪漫、夜景的嫷雖然誠迷人．．．．。路邊的野狗，實在驚人。

阮捌參阿爸講著阮囝誠狡怪〔kau2 kuai3 彆扭〕，阿爸笑笑應我講：「若參汝細漢時比起來，伊算誠好帶〔tshuā〕啊啦！」

佇路裡等囡仔的時陣，回想著細漢時的我，厚沙屑歹育飼，若毋是父母疼愛、手足包容，我毋知會去夆掞唯佗位去咧！

阮厝蹛三合院的護龍，房間倚正身，中間仔的兩爿是房間佮灶跤。

房間的眠床干礁會當睏兩個大人佮兩個較細漢的囡仔，其他較大漢的囡仔睏佇中間仔的總舖。

阮小弟仔出世了後，我道算是大漢矣，房間阿母身邊彼位阮愛讓出來予小妹仔佮小弟仔。

中間仔總舖有大姐、二姐、哥哥參我，欲睏進前逐家話講袂煞，兄姊有時講故事、有時背唸冊、有時講學校的代誌．．．．。我未讀冊進前道會曉念「天這麼黑、風這麼大．．．」是唯兄姊遐學來的，雖然毋知字按怎寫，唸冊歌嘛感覺真心適！即馬回想起來，奚是我真幸福的時陣；規家伙仔擠佇竹管仔厝內底，雖然散赤，但是溫暖。我想，彼時除了散赤，準若閣有甚乜欠缺，道是足茹〔ju5 胡鬧〕的我啦！是講．．．人我嘛毋是特工欲共人茹的呢！

當兄姊怹睏去的暗暝，對我來講是驚惶的開始！

誠欣羨怹講睏道睏去，佇烏烏暗暗的深夜，開始有各種的聲音走來予我聽．．。

頭先是遠遠的庄內有人喝掠賊、續落狗仔兇狂吠，無外久，我道聽著有人咧挵中間仔的門，頭仔我會覕佇綿被內底毋敢振動，忍椆咧無欲吵阿母，但是挵門的聲一聲比一聲較急、一下比一下較大下。我是驚甲疲疲掣，是安怎兄姊怹攏無聽著咧，連睏佇房間內底的阿爸佮阿母嘛無聽著，我愛勇敢、我愛忍耐，毋好吵阿母，我一直安呢共家己講。尾矣我猶是忍袂椆，想講賊仔就欲共門挵開走入來阮厝矣，大聲叫：「伊呀！有人咧挵門啦！」阿母誠緊共房間的電火點著，行出來輕輕仔共中間仔的門打開，叫我斟酌看，共我講：「汝看，攏無人哦，暗摸摸，逐家攏咧睏矣，無人會來咱兜啦！」

奇怪，明明抵則道有人咧挵門，是毋是聽著阿母的跤步聲走去覕佇豬椆邊的黃槴仔園咧，足想欲叫阿母帶我去看覓咧，無講出來，聽阿母的話乖乖睏。

無偌久，煞變灶跤有人動碗盤奇怪的聲音。即時陣驚惶的我，嘛是共家己講：袂使驚、袂使驚！忍耐到尾矣，灶跤的聲愈來愈濟．．．刴豬菜的聲、煎匙撓〔lā〕鼎的聲、洗米的聲．．．．．我驚甲規身軀汗，若無叫阿母起來看覓咧，我會驚死！

阮竹管仔厝隔間無關門，阿母親像規暗攏無咧睏共款，我一喝出聲，伊道隨共房間的電火切著〔to̍h〕，行出來問我啥代誌，我共伊講灶跤有人動碗盤。阿母真緊共灶跤參中間仔的門頂頭彼葩五燭的電火珠仔切著，共我講：「汝看，灶跤無人、碗盤嘛好好無人振動，緊睏哦！」

．．．．即款凌治阿母的齣頭，毋是一暝兩暝，是真長真長的一段歲月。

有一工，我吵完阿母了後，聽著少我兩歲的小妹仔聲音愛睏愛睏共阿母講：「伊呀，三姐仔足吵的．．．」阿母細細聲共伊講：「三姐仔身體無拄好較刺疫〔tshiah-ia̍h煩躁〕，汝乖，緊睏哦！」

人我真正有聽著彼寡仔聲，參跤袂行的刺疫無關係啦。

毋知底時，暗時擾亂我的聲音走無去矣。

想著細漢時赫呢凌治阿母，伊那當會椆咧？是為母者強嗎？

唉！可惡的我。

暗暝佇曠闊〔khòng-khuah〕的田洋農路想著遮的，等囝的驚無算啥。

遠遠看著阮囝騎鐵馬仔的形影，緊倚去參伊同齊行。

綴囡仔鐵馬仔的後背，機車大燈共伊炤〔tshiō〕路，慢慢仔陪伊行，欲跳過路的四跤仔、走相迮的鳥鼠仔．．．阮小心毋通轢〔kauh輾〕著怹。有時落雨過，有四跤仔美妙的歌聲。

問囡仔：「迹呢暗的路，汝敢袂驚？」

伊講：「袂啊！捌搪著罩霧，足嫷的！」

為母者強嗎？閣假若毋是咧！

阮囝猶是幼嬰仔的時，我若看著路裡喪事隊伍內底有細漢囡仔，我都綴人流目屎，心內想講倒佇棺材內底的人若是我，阮囝是欲去佗揣阿娘？

做老母了後，我則變甲足愛哭的。所以．．．為母者強嗎？汝講咧！