輕輕仔掀起冰櫃頂懸彼條面巾

予阮閣看一擺三伯汝最後的一面

像睏去彼一樣的平靜

像在生彼一款的慈愛

是有聽著共汝講的話？

肉體〔jio̍k-thé〕還予天地

靈魂仙遊四界

無插管、無氣切

從今以後

自由兩字是汝的

請汝一定愛保庇

這陣徛佇我身邊

汝的屘囝阿華伊

我永遠都會記

彼年

七歲的我

猶佇阿母身邊膏膏纏

六歲的伊

送伊的阿娘上山去

聯竹布

予雨沃甲澹糊糊

大人講

彼是伊阿娘佇天頂

毋甘細囝目屎像落雨

逐个看著心酸喉管淀

三伯在來出外做生理

阿華倚靠的是伊阿姐

共阿姐當做老父、嘛當做娘嬭

阿姐到年歲，媒人婆講親欲出嫁

鑼鼓八音新娘轎

阿華輕聲問：「屘嬸！阿姐敢會使莫出嫁．．．。」

阮阿母應伊講：「戇囡仔，咱食人的檳榔餅、就是人的囝！」

三伯啊！汝一定愛保庇伊

伊自細漢無阿娘

人生路行著誠孤單

講起人生尾站的汝

毋甘又無奈

伊講：

肺部的功能賰一爿

欲入院進前

有經驗的人建議怹

時陣若到莫急救

予汝平平靜靜來離開

誰知．．．時陣到

看汝意識猶清醒

大氣踹袂離

醫生講：即陣插管猶會赴、若無愛急救請家屬簽字

．．．．．．．．

簽字！？躊躇又躊躇．．．

猶是插管來救汝

插管的結果換氣切

有話講袂出來

寫出來的字像謎猜

三伯啊

真想欲問汝

準若汝

會做啥款的選擇？

我知影

這馬問汝．像問天．．．．