袂記得標日期...應該是2007年左右寫的

囡仔無佇厝裡了後，欲睏進前，我會佇二樓摸一睏仔電腦，若好運，佇msn內底會看著伊佇線頂，雖然有時參伊講兩句仔話，伊總是回一、兩字．．嗯、哦、哦！

我這個戇老母按呢想：囡仔佇線頂，無論有講話無講話，總是表示伊人平安佇宿舍，按呢我就滿足嘍！

電腦囥佇二樓客廳，電火用一個四尺的日光燈佮一粒100燭的電火珠仔。光線充足，二樓有便所彼間房間，做閒間仔用無咧蹛。寒人囥熱人的衫、熱人囥寒人的棉被。欲入去便所時，我就罕呢閣切火。

彼暗將電腦關掉，準備欲睏矣，跤拄欲踏入去便所的房間，一隻鳥仔佇房間飛起來，因為光線無明，看袂清、加上家己的幻想．．．彼隻鳥仔看起來像一隻鶆鴞彼大隻，遮閘半個房間的天房〔thian1 pong5天花板〕。驚一下喝足大聲，共已經睏去的阿勳驚精神，叫是我又閣跋倒，問講：「按怎啦？」我講厝內有一隻鳥仔。伊聽我講煞知影人平安、無代誌，就隨閣倒落下睏去矣。

彼時我已經毋敢用樓頂的便所，落去樓跤解決。欲睏，驚若起哩樓頂閣遇著鳥仔，想欲樓跤睏，閣驚彼隻看起來大大隻的鳥仔飛落來找我，若按呢….我就會驚死矣！牙齒根咬咧，想欲用真緊的速度起哩二樓，誠害，跤手都毋聽話哩！心肝嗶噗彩，房間門關咧，緊鑽入去蠓罩內底，希望彼隻鳥仔袂曉開門、掀蠓罩。

透早早頓款好，欲上班進前，起哩樓頂落地玻璃窗齊開，欲趕鳥仔出去。鳥仔唯閒間仔飛出來，一看，嘛才一隻細細隻仔的厝鳥仔爾啊，昨暝用幻想，共鳥仔放大幾何倍，嘛將驚惶放大幾何倍。

毋知是隻仔戇，抑是驚，毋敢飛低，干礁唯頂頭封死的玻璃窗一直飛，這隻戇鳥，赫呢拚勢欲找自由，找毋著門，較拚嘛無彩工．．．。上班的時間欲袂赴矣，驚伊佇厝內無物件通食會枵，搣一把米囥佇玻璃邊的椅仔，希望伊會較巧咧來食米．．．！

下晡下班，阿勳講伊已經共鳥仔趕出去矣！ 

幾何工攏無啥敢暗時去用樓頂的電腦。彼暗欲用，問伊鳥仔敢真正無佇厝內底矣？

阿勳講，嘛才一隻鳥仔爾，是咧驚啥？！