車隊到新營太子宮的時已經尾暗仔矣。

車才停落來，兩个騎鐵馬仔的囡仔行倚來，我袂曉判斷怹的年歲，掠準是國校仔佮幼稚園仔的囡仔咧，問起來才知影，一个國中升2年、一个國校仔升4年，兩个是兄弟仔。

攏真活潑，大漢个指手搖車講，伊捌耍過，耍甲píng車，而且píng兩改。

哪講，哪對手搖車摸咧摸咧….

細漢的對咧摸，哥哥共喝講：你莫烏白耍啦！

照講手搖車真罕呢有地看，伊講是爸爸𤆬伊去耍的。

細漢个看大漢个咧介紹伊的英雄事，輸人毋輸陣講：阿姨，我會曉khiàu孤輪。鐵馬仔佇我面頭前隨表演khiàu孤輪。我喝講危險，毋好按呢耍。

大漢的講袂啦。伊閣有才調騎鐵馬仔放雙手騎足遠的……….

真難得的是，怹攏用滑溜的台語參咱講話，我問怹哪會曉講台語？講是厝裡攏講台語。真歡喜，台語的死期又閣延後一寡仔！

大漢的額頭有一个疤，我問伊捌跋倒齁？伊講毋是跋倒，是紩過。

戇囡仔，無跋倒受傷，哪著紩？是講，嘛有可能毋是跋倒的傷。

講著額頭這个疤，伊有真濟佮神有關的故事欲講。

對頷仔頸giú出來一个香煙出來講：我的守護神是太子爺，是按怎我會變做這个？

伊講額頭有疤，是另外一个神（我聽無伊講的彼个神是啥？）

細漢的聽哥哥講著神，就講伊會曉跳八家將。鐵馬仔下咧，就跳起來矣。

怹是廟口附近的囡仔，對神的故事捌比我較濟，一直講、一直講，聽甲我花sà-sà。真歹勢家己聽無囡仔咧講的故事。

兩个相爭叫阿姨，欲𤆬我四界看看咧。講怹遮有足濟好耍的，熱情催我參怹行。

我講袂使得，阮是團體行動，等一下會叫集合。

怹看有人離開隊伍，講：妳看，人怹都出去。

我是路痴，驚參怹出去揣無路轉來。

共怹講：好轉去食飯矣。

怹講爸爸抑未煮好。

一般的囡仔若看著阮

會問：妳的跤按怎？

看著手搖車會問：恁哪欲騎這種車？

怹哪會攏無遮的問題？

我頭殼內底按呢想，毋知答案佇佗位？

第2工透早欲離開太子宮進前，看著一个騎戰車，載昨昏彼个細隻的，佇廟前踅一liàn，閣走去矣。

啊！怹是來送解答予我的。

原來怹厝裡有參阮仝國的人。