2021.04.21寫

頂一遍行入戲院，應該是五、六年前來看『灣生回家』，每一擺行入去戲院看電影，總有無仝款的感動。

這間戲院最近整修重開幕，戲院的名嘛改矣。無改變的是，無障礙設施猶是無被重視。

佳哉今仔日是參同事翁仔某來，怹攏是消防員，氣力飽足，殘障坡道崎度驚人，閣是用鐵枋舖設的，看著跤底攏ngiau起來，佳哉有怹助我，才會當順利入場。感謝愛心夫妻。

有人講［爆雷］的人比糞埽較不如。所以今仔日無欲講電影的內容。來講看電影了後，我想著彼个人......

讀冊的時蹛學舍，一个涼冷的秋天，我參人流行重感冒。校車載我去病院吊大筒的了後，就倒佇宿舍歇睏，醫生交待著歇幾工矣，袂使去上課。彼波的重感冒，宿舍內底倒幾何个學姐、學妹。厝裡蹛近位仔的，有親人來照顧，阮厝彼陣仔已經搬去北部，我無想欲予爸母煩惱，所以無通知厝裡的人。

替阮學校學生仔洗衫的阿桑，有一个後生，聽講拄出獄，阿桑共伊呼來身軀邊鬥做，下晡時收衫的代誌就交待予伊。

平時仔伊收衫入來的時間，阮猶咧上課，我毋捌看過伊。感冒歇睏彼陣仔才頭一遍看著伊，伊會問我有較好否？看起來無成坐過監的人。

有一日伊捾一罐青草茶來，講是伊叫怹阿母燃欲予我啉的，伊講青草仔茶淡薄仔苦苦，伊有囥足濟黑糖。我叫伊嘛捾予其他感冒佇宿舍歇睏的人啉，伊講免啦，怹攏有親人來。

後來感冒好矣。毋知是藥仔有效，抑是阿桑燃的青草茶啉好去的。

過一站仔，聽講學校不准阿桑的後生入來學校鬥收衫矣。講是欲保護學生仔才按呢做。

我想，學校是好意的。毋拘，我猶是感覺伊是一个好人。

伊的青草茶內底，有愛心！

。

你這馬好否？