2021.08.03寫

昨暝十點外，我已經入去半夢半醒之間。

：「啊這馬若欲去病院欲按去？」

：「今我都毋敢駛車矣。你閣毋坐救護車，就偆叫計程仔爾！」

敢是咧陷眠？最近毋知按怎，誠厚夢。

這幾日定定聽伊講腹肚無爽快，叫是食pháinn腹肚。

就煮較清咧，陪伊食幾ah頓糜仔。

昨下晡趁無雨，去市內診所提藥仔。醫生講是［腸仔絞疼］。這敢毋是幼囡仔較會有的症頭？

診所的藥仔食兩遍，無改善。

暗頭仔看伊早早就入去房間咧倒，講是無爽快。

問伊著看醫生否？伊咧躊躇。

十點外才講…若欲去病院欲按怎去？

原來我毋是咧眠夢。

兩人攏坐輪椅計程仔無才調載，臨時欲叫復健巴士嘛無hiah 快叫。我起來穿鐵鞋，準備出發。

佇車底，運將問講：恁欲去急診，有急否？

若有咧趕伊欲開較緊咧。

阮講無要緊，慢慢仔來。

雨愈落愈大，嘛是著行。

這時陣閣較確定，毋是咧做夢。

入去急診，參頂tsuā來的時規間攏人無仝，冷冷清清患者無幾个。武漢病毒改變就醫習慣這層事，應該共這隻病毒記一个『嘉奬』。

等無偌久，醫生問診了後，一筒點滴掛咧，若滴若做檢查。抽血、驗尿、照超音波、Ｘ光、核磁共振....

武漢病毒來台灣了後，我若去病院，攏會紮家己的輪椅，坐起來較安心。昨暗我無紮家己的輪椅。入門hia借一台來坐。suah是一台五不全的輪椅。正手爿手咧lián的外框斷去、倒跤無跤踏仔、擋仔偆一爿。我若緊張，就足tsia̍p走便所，彼是讀高中的時蹛石牌仔，厝裡淹水驚tài來的腸躁症。幾偌十年的症頭，無代誌太平時期，咱叫是好去矣，若是代誌一來、一緊張，無人請伊就家己來。

這台擋仔偆一半效果的輪椅，佇便所使用的時誠危險，這暝毋但著走便所，伊做檢查我嘛tuè上tuè落，無一台好用的輪椅袂使得。

欲按怎？

我家己去揣一台較四序的輪椅。

想講彼台pháinn去的輪椅足可憐，已經殘破不堪，閣著繼續做工。

醫生來報告檢驗結果的時，講是結石。這時陣已經翻點。

醫生問講欲佇tsia 等天光看專門科的醫生、抑是掛號等另日才閣門診，醫生會安排時間處理結石仔…伊人有較爽快，阮就轉來厝歇睏。

回程的計程車司機誠體貼，阿勳落車了後，閣替阮捒到門口，我咧開門，問講：厝裡kan-nā恁兩个？

厝內彼隻貓拄好咧叫，我應講：閣有一隻貓。

兩點外，聽伊睏去的喘氣聲，聽著足安心。

佳哉是結石仔咧疼，毋是內心本成咧臆的...這應該是所有的病疼，上蓋簡單的困難，著向上天講一聲感謝！

我嘛誠thiám矣，愛睏神來矣，目睭皮瞌咧，suah睏袂好勢。

倒正爿腰痠疼、倒倒爿鼻仔袂通、倒直直袂曉睏。

鼻仔的症頭，疫情舉起來了後，就無閣去提藥仔，lún啊lún都也過tsiah久矣

這幾日一直落雨，鼻仔就閣開始嚴重罷工。

今仔日請休假，早起賴醫師有咧看診。

賴醫師是一个會參咱開講，溫柔、親切的女醫師。

我共伊講腰痠疼我已經毋敢數想欲醫好。因為正跤袂曉振動，自細漢靠腰的力咧控制正跤的行動。久來，腰嘛thiám矣，［靠腰］是正常的，咱會當講啥。

若是鼻仔，食藥仔雖然袂斷根，毋拘猶會較好喘氣，睏的時會當順順仔喘氣就誠幸福矣。

醫生毋甘毋甘講：辛苦啦！

袂啦！我講這應該有天的用意。

按怎講？

啊我一世人過甲tsiah快樂，若欲走的時，會毋甘走。啊若想起tsia的身苦病疼，咱就較甘願放手啊！

醫生講：按呢講是無毋著啦，毋拘......！

無要緊啦

閣較苦的難關，總會行到路尾、然後結束。

伊袂停睏佇上困難的hit-tah。

* * * *

1.pháinn=壞  2.hiah＝那麼  3.hia=那  4.lián=轉動

5.tsia̍p=常   6.tài=致      7.tuè=跟  8.tsia=這裡

9.thiám＝累  10.lún＝忍   11.tsiah=這麼  12.tsia=這些