2021.08.15

彼暝送阿勳去急診

我無膽閣gâu緊張

半暝仔傳一个訊息予二姐問伊：妳佇佗？

二姐工作中.....

阿勳急診了後，安排門診。

門診的時

閣做一遍X光。

結石仔無佇片仔內底

醫生講腹肚感覺猶有各樣，表示石仔猶未出來，只是毋知bih佇佗。安排住院處理。

疫情期日，欲住院真麻煩、毋處理閣驚毋知會怎變化。

心情佇欲佮毋的中間giú大索，我的心嘛tuè咧浮浮沉沉袂心誠亂。

拜二暗時，二姐來矣。看著伊，心花齊開，無論代誌怎變化，有二姐，我就毋驚！

二姐知影阿勳無爽快，就請頭家安排人來接伊的khang-khòe，準備來斗六。

我講：「看著妳來、就足安心！」

對二姐的依賴，是自細漢開始。

我囡仔時，爸母無閒逐工出去做khang-khòe，我佮小弟、小妹仔是二姐咧tshuā。

二姐入學的冊單通知來的時，我若像天欲崩去彼一般。

共二姐攬咧一直哭、哭無愛予伊去讀冊。阿爸叫二姐慢幾年ah才去讀。袂記哭掉幾張二姐的入學冊單，才放手予伊去學校。

二姐講，伊去學校的時，攏會掛心我，毋知會pê去溝仔邊耍跋落溝仔底否？伊講到甲伊家己生囡仔做老母，彼種為囡仔牽腸掛肚的心情，才知影細漢彼時為阮的擔心，原來是做老母的心情。

我問二姐，妳敢袂想講這个小妹仔遮麻煩，跋落溝予伊去嘛無要緊。

伊講：袂！

其實我知，阮厝裡的人無甲一个感覺我是麻煩，雖然我無論行動、無論個性，攏是一个足麻煩的跛跤仔，怹猶是疼惜我、幫助我。自以早、到這馬。

小妹仔講：二姐一直是咱的靠山。

無毋著！

足感謝爸母，生遮濟手足予我做伴，佇我驚惶的時，有人助膽、安搭阮的心，予阮佇人生路途，踏著輕鬆的跤步，繼續行。

阿勳身體有較好勢、無欲住院矣。

二姐倒轉去內壢仔繼續伊的工作。

感謝天保庇阿勳平安、感謝二姐來幫忙。

＊＊＊＊

tuè=跟

bih=躲

giú大索=拉扯

hiah＝那麼

tshuā=帶

pê-爬

khang-khòe=工作