字體：小 中 大 |
|
|
|
| 2022/10/27 16:41:47瀏覽188｜回應1｜推薦4 | |
2021.09.04
阮大姐定定問小弟仔阿維：你敢閣有啥袂曉的代誌？ 囡仔攏講怹這个阿舅是［馬蓋先］，啥物件歹去，伊都有才調修理予好。
二姐的孫仔細漢時，𨑨迌物仔若故障，會唸講：無要緊，舅公修理。
就是按呢，我講伊有學著阿爸修理物件的手路。
這遍，共我厝裡這台食電的熱水爐修理甲好勢好勢，看起來，伊修理物件的級數，已經超過當年的咱阿爸矣。
伊攏講伊讀電囝科（電子科），毋驚電。
電的部份阿爸伊較無咧bak。
拄蹛入來這間厝的時，食瓦斯的熱水爐裝佇厝內。
每年冬天一到，新聞往往會報瓦斯中毒的事件。這時陣，就會接著阿爸的電話，關心我厝裡彼台食瓦斯的熱水爐，予伊煩惱真久，彼台食瓦斯的害去了後，才裝這台食電的。
阮蹛這所在，水質誠gâu kha̍h tái，熱水爐三不五時仔tái kha̍h咧就會滴水，著叫水電師來整理。
最近，佇灶跤煮食的時，又閣聽著水咧滴的聲。厝裡代誌濟，無看著滴落來的水四界流，我就放伊去滴，無叫水電師來修理。
頂工阿維來，仝彼一日，我看著水滴流出來塗跤矣。
我咧唸講，著閣叫人來修理矣。
阿維看看咧講：我來！
「你有才調？」我按呢問
伊講：「喂！你無相信呢？」
我是想講逐遍看水電師咧舞若像誠費氣。
阿維騎我彼台連機車店的師傅都毋敢騎的戰車，傱出傱入，去材料行款料，毋成猴，轉來無三兩个手就修理好矣。
阿維對公司退休了，台灣全島四界走，啥必工課都做。
現此時走去到南投，講是咧替人籌備的露營區做水電。
南投！會記得阮阿爸佇阮細漢的時，捌去南投替人接梨仔…彼陣仔大姐猶無蓋大漢，tuè佇阿爸身軀邊做助手，阿姐講彼个工課有夠ngē-táu，雖然山頂的寒天真寒，阿爸猶是跤手mé-lia̍h，阿姐是囡仔工，想講袂輸予其他同齊咧做的工人，緊緊追趕阿爸的速度。
阿爸年紀較大了後，捌佇咧食梨仔的時講：廿世紀梨仔，就是我以早去埔里接栽仔的。
毋知會有一工否，阿維的囝孫仔tshuā伊去露營，伊講：這露營區的水電，是當年我做的！
逐工用著sù-sī sù-sī的熱水爐，我嘛足想欲問：阿維、你閣有啥袂曉做的代誌hannh？
** * * *
bak=沾
gâu=會
kha̍h tái=積水垢
tuè=跟
ngē-táu艱難
mé-lia̍h＝敏捷
|
|
| ( 心情隨筆｜心靈 ) |
