字體：小 中 大 |
|
|
|
| 2022/10/27 13:36:57瀏覽71｜回應0｜推薦1 | |
2020.07.14寫
醫生看了，我出來走廊等提藥仔。漢藥粉真苦，醫生建議我食藥丸仔，咧做藥丸仔著時間落去等。 坐佇走廊的機車頂頭，手機仔罔pué。
雄雄一个像去予人拍甲誠忝的hoah聲對內底傳出來。
一个穿一領工廠制服的媽媽，用輪椅捒一个囡仔對病院內底出來，彼个囡仔的頭殼碗插足濟支針，看起來無成十歲嘛有八、九歲仔。面模仔生做真媠，大漢了應該是一个緣投囡仔。坐佇輪椅內底，下性命啉。拄著熟悉怹的問講：哪無愛佇內底有冷氣較涼？
彼个媽媽應講：看著醫生就大細聲哀，共人吵著….
過無偌久，一个國中生行倚來，參坐佇輪椅內底的囡仔生做仝款仔仝款。
：「你共弟弟顧咧，我入去一下！」
穿制服的媽媽，應該是上班中途𤆬囡仔來治療。
國中生，下課綴來鬥顧小弟仔。
這時陣
想起我的阿娘。
我猶佇田尾仔讀國小的時，家己田裡工課若閬縫，伊呀會去庄內共人鬥做工。尾暗仔我下課的時，若落雨，伊會共頭家講，伊欲去偝我轉來，等一下才閣轉來做。
阿母袂曉騎鐵馬，伊攏是用伊的雙跤行遠路，背我下課、偝我看醫生。
阿母講伊若工課做甲一半去偝我，彼工攏會做較晏才歇睏，做還人。因為人肯半途予咱走一下，就已經真好矣。
阿母講伊毋甘我行路慢閣予雨淋，若遠遠看我一hua̍h一hua̍h慢慢仔行，伊就緊走倚來共我偝起來。
我猶會記得 阿母kha- tsik -phiaⁿ流汗的味。
我猶會記得
覕佇阿母舉的雨傘下跤，雨聲變做一種美麗的旋律，聽著真安心，真温暖。
看著邊仔咧顧小弟仔的國中生。我嘛想著我的兄弟姐妹。怹嘛是像按呢真有耐心照顧我、讓我、惜我。
藥仔提了，機車騎離開病院，已經過兩个青紅燈，猶聽著彼个囡仔的âu-kiò。
是伊真正喝甲遐大聲？抑是我幻聽？
倉天啊！你出這門功課，為難啊！！
足無愛看著路邊苦楝舅樹尾頂咧puh新穎。因為苦楝舅若開花，就是阮成做孤兒的季節。
誠緊，阿母離開欲十年矣，想起伊為我所食的苦湯，毋甘閣心酸！
人生的苦，其實苦過藥粉仔幾何倍。＿ ＊＊
手機仔罔pué =漫無目的的滑手機
Hoah=吼
一hua̍h=一步
kha-tsik-phiaⁿ=背部
âu-kiò=喊叫
puh新穎=發新芽
|
|
| ( 心情隨筆｜心靈 ) |
