字體：小 中 大 |
|
|
|
| 2022/08/17 15:54:50瀏覽293｜回應0｜推薦8 | |
2020.06.26寫 防呆手指簿仔【台語文】（防呆備忘錄）
昨暝siuⁿ忝，早早就予愛睏神迷去；昨昏縛粽的筆記，今仔日補寫。
頂月日北部兩个阿姐、姐夫佮蹛南部的小弟仔、佮阮囝，佇斗六縛粽。
像往過按呢，阿爸別世的日子前後，佇斗六縛粽變做一種思念的儀式，嘛借機會交流兄弟姐妹的感情，爸母無佇咧矣，手足之間見面的機會罕罕矣無幾時。
今年無仝的是，無閣縛粞粽矣。
因為粞粽厚工閣著下大力落去撋，逐个攏老矣，二姐建議縛囡仔較合食的米粽，我對款料的數量，誠頇顢計算，縛粽的料，攏交予二姐佮阿維去發落。粞粽的滋味，今年缺席。
彼遍縛的粽，佇五日節進前食了矣。想欲去買，食來食去，毋是無塗豆、就是餡包肥肉，啊無就是用粽葉仔包油飯的北部粽。
無塗豆的米粽我無愛、有肥肉的阿勳毋敢食。
我包的餡誠簡單，合意食是因為彼有細漢時的記持。
家己來款料縛粽。
款料？縛粽的經驗上無嘛有三十年較加矣，毋拘偌濟米會當縛幾粒粽？每一遍攏予我想真久嘛想無。
這遍縛粽佇遮筆記，另工欲縛揣資料來看，免閣激頭腦。
胛心肉一包….兩工前，切一塊一塊，米酒、豆油、蒜頭佮胡椒粉sīⁿ起來，囥冰箱冷藏。
主婦聯盟1公斤裝的米*2…..浸3點鐘以上。
粽箬1包，大約百捅phiò。用燒水浸予軟，洗清氣。
一般粽捾20粒一捾。我會共分做10粒一捾。按呢煠粽了，佇燒滾滾的鼎仔內底欲píng、欲捾，較袂siuⁿ重。
紅蔥頭半斤，頭尾撿清氣切幼（毋好siuⁿ幼）。
金鉤蝦1包，這个物件華文哪會寫做蝦米、蝦仁？去主婦聯盟訂貨的時，足驚怹看做是鮮的蝦仔仁。若阮是講冬蝦。泡予軟。
香菇1包，泡予軟切，一蕊切做3-4塊。
這3項攏單獨用較濟油炒予芳，ko͘起來備用。才閣lām sīⁿ 好的胛心肉做伙炒。
炒好的時對鼎邊sē淡薄仔豆油較芳咧。(火著隨關掉，避免臭火焦）
以早胛心肉我攏無炒過，頂工二姐怹來，共我講按呢毋著，冷冷的肉、佮燒燒的餡同齊包，無妥當。
我講彼是阿爸教我的呢！
問我是當面教的，抑是電話教的？
是電話中講的。
大姐講，伊綴佇阿爸、伊呀身邊縛粽歷史悠久，從來嘛毋捌看過冷冷的肉提來包餡。
講起來，應該是我聽毋著。
我用按呢包三十捅年矣呢！嘛攏講足好食的啊。
阿姐怹講的有道理，燒的、冷的包做伙，有影較奇怪，以早哪會攏無想著。
今年我就改用怹的方法。
這馬的少年仔連塗米沙仔縛粽攏毋捌耍過。同事聽我欲縛粽，講伊想欲學。
我想講，今這聲慘矣，阮阿姐彼步拍活結的方法，我仙學都學袂起來，欲按怎kâng教？
對拗粽箬仔用棉索仔縛起來，伊干但佇拗箬仔做粽形的時，用寡仔時間，少年人反應好，真緊就上手。予我誠意外的時，我袂曉的索仔拍活結，伊的手法竟然參阮大姐的一模一樣。
哪按呢？
伊講消防訓練的時有學過！
啊？消防訓練佮縛粽！
粽縛好，hiânn燒水下兩捾粽（20粒）落去煠，半點鐘了後，兩捾頂下對調，閣煠半點鐘，好食的燒肉粽就按呢上桌嘍。
煠粽的時，頂頭囥一塊較重的盤仔，共粽硩落去水底，煠起來的粽，較袂懸低粒。
粽煠好，厝內燒hut-hut。
去溪仔邊納涼。看著一蕊予日頭曝甲強欲lian去的玫瑰花。
雄雄想著，這日，是我佮阿勳結婚33週年的日子。
當初彼个對未來充滿幻想的新娘，今嘛變『老娘』矣。
＊＊
手指簿仔=備忘錄
siuⁿ忝=太累
撋=揉、搓
百捅phiò=一百多葉
欲píng=要翻
ko͘=撈
lām=參雜
sīⁿ好=醃漬好
sē=沿邊緣淋
燒hut-hut=熱騰騰
紀錄2020.06.25縛粽
|
|
| ( 心情隨筆｜心靈 ) |
