2007.10.15寫

佇囡仔細漢時，我不知不覺將全精神囥佇囡仔身上，等到伊大漢離開阮身邊，加出來一大堆的時間，袂曉創啥！

佇伊抑未出外進前，我總是想講，大不了共加出來的時間提來看冊、提來練琴、提來聽講經．．．。時到，以早無時間做閣足想欲做的代誌，煞一點仔都無心情心情去做。

尤其是找囡仔找無時，六神無主，像欲掠狂的痟狗！

這，予囡仔誠大的壓力，我共囡仔講我願意學習放手，但是佇適應的初期，請伊配合，予阮較放心咧，我就較緊放手！

伊總是講：媽，拜託你去找一項代誌來無閒，較袂佇遐烏白想。

即馬知影愛予阮去找代誌做哦，以早咧，一半工仔歇假欲出門，伊總是講愛家己款食足無方便！

這禮拜囡仔轉來，拄好讀虎尾科技大學的阮姪仔帶李同學來厝裡，我參怹開講時講，佳哉囡仔欲台北進前有共阮兩個老的教即時通，予阮加一個管道知影囡仔的消息。囡仔應講：早知莫共恁教，恁足厚操的！

我講按呢我會閣較捷打電話。李同學講爸爸媽媽會曉用電腦足好的，伊講伊參怹哥哥攏出門矣，無人教媽媽用電腦，所以媽媽干單會當看電視。伊捌手機仔設定錯誤，接袂著任何消息，伊媽媽人佇台南，只好打電話請警察幫伊去學校找囡仔。

囡仔人敢會解，情況不明的心情，是外呢使人著急。

我會赫呢煩惱阮囡仔，一半的確是個性，一半是因為伊去台北進前，誠無自信，共我講足驚台北的囡仔看無咱草地人。

我有一位朋友，怹小弟佇庄跤讀國中，高中時拼到台北建中去讀，一睏仔囝生活方式差傷大，等到考著大學時，無法度適應，差一點人規個人生攏烏有去，佳哉怹阿兄用心引導、耐心共用親情共伊治療，才予伊恢復健康的人生。

即擺我問囡仔講，你以早煩惱講台北囡仔會看無咱的代誌，敢有發生？

伊講：喔，逐家攏嘛足親切的！

我講：著啊，你若予我知影你過了足好的，我無事吵你欲創啥？

拜六帶伊去市仔買物件，看伊參人接接加足自在，跤步踏落加足自信。

是我siuⁿ過慢放心。

會記得伊細漢時，總是驚伊食飯食袂好勢，逐頓共伊飼，到伊讀國小，我嘛是共伊飼，我足盲目的，無看著家己的囡仔已經大漢矣。一直到有一站仔我去學電腦，足久無參怹兩父仔囝鬥陣食飯，有一工雄雄發覺講，囡仔家己會曉舉箸，感覺足意外的。怹阿爸講：這哪有啥，莫驚伊食徦滿四界，放伊家己來，伊自然就會曉矣！

伊欲去坐火車時，怹阿爸共伊講：一般序大人關心囡仔是正常的，咱互相配合，到位打電話轉來報平安，這是禮貌，有欲出門幾個工無佇咧，打電話講一聲，阮就袂急欲找你．．．。

2007/10/15