字體：小 中 大 |
|
|
|
| 2022/07/26 11:24:55瀏覽280｜回應0｜推薦8 | |
2020.06.19寫 下晡去共這雙4月底訂做的鐵鞋提轉來。
貴森森，一雙4萬箍。佳哉政府替咱出一半。
孤門獨市，這个時陣鐵鞋仔工廠嘛歹紡。因為小兒麻痺的人袂閣增加，大部份［老］兒麻痺嘛攏已經坐佇輪椅頂頭矣，穿鐵鞋的人愈來愈少。以早就真貴，這馬閣較貴、是必然的代誌。
我這馬坐輪椅的時間雖然愈來愈長，毋拘逐工出門上班嘛是著穿鐵鞋。本來無拍算欲閣做新的。這雙穿六、七年矣，跤袂行，suah 會肥，肥甲鐵鞋仔siuⁿ細雙，熱人穿著誠癢。起凊吶的症頭觸纏年外，三不五時仔無代無誌就發作，身軀蠓叮著的癢、穿鞋仔引起的癢，閣較會招起凊吶來鬥鬧熱。做一雙較大雙的鐵鞋來穿，看會較袂發作否。
這應該是我上尾一雙鐵鞋矣。
從國校仔4年穿頭一雙，到今半世紀過去矣，做上落尾一雙。
第1雙鐵鞋是欲入去和美仁愛學校的時做的。過幾何年，哥哥欲做兵進前，提錢予我去做一雙新鐵鞋，伊才安心去做兵。
以早做鐵鞋，政府無咧補助的。佳哉我有哥哥全額補助。
嘛毋知當時開始，政府開始補助輔具的支出。
講著這雙袂行閣會肥的跛跤，我嘛感覺足好奇。一般袂行的跤，攏生做若鳥仔跤細細支仔，真少看著像我遮大箍的跛跤。
莫怪我頭一遍去做殘障鑑定的時，醫生看我的跤，問講：你真正袂行？
：「啊無我是足愛穿鐵鞋hioh？」我按呢想、無應聲。
誰叫我的跤生做像[正常人]的跤。
真濟小兒麻痺的患者，細漢的時大部份攏會去開刀。村幹事嘛定定來共阿爸講，予我去屏東開刀。阿爸有做一个知識份子的判斷能力，伊講我的跤，就若像電火球仔內底的鵭絲燒去，袂當修理。無欲予我去hông加刣彼一刀。
阮叔伯小妹仔嘛是［共殘黨］，我看伊去開刀了後，穿鐵鞋、舉枴仔攏原在，跛跤袂好啦！所以佇我欲入去仁愛學校的時，身體檢查叫我著先去開刀，歇一年才入學。我無按呢做。
我咧想，是毋是無開過刀的跤，就會繼續大…..
我若像揣著跤肥的理由矣。
平均六、七年著換一雙鐵鞋，每一遍換鐵鞋的理由，大概就是穿久矣，冗去穿著袂四序，行著路鐵鞋怪聲一大堆。
我有一雙換鐵鞋的理由較特別。
彼是有一年過年，參厝裡的人去渡假蹛民宿。全部的人攏睏佇總舖頂頭，鬧熱滾滾，温暖濟濟。
暗時仔褪鐵鞋囥佇壁邊，半暝仔予跋倒的二姐夫硩扁去。小弟仔阿維共民宿頭家借家私，摃遮摃遐、搝來搝去，勉強穿咧繼續渡假的行程，鐵鞋是量身訂做，誠精密的物件，扁去的鐵鞋，當然無才調恢復完全，穿著誠礙虐，就閣去做一雙。
穿著新鐵鞋，希望會當行踏台灣每一个我想欲去的角落、jiok著每一个媠媠的夢，然後才予鐵鞋退休、予我歇睏！
＊＊
箍=元
拍算=打算
suah =竟然
siuⁿ細雙=太小雙
起凊吶=蕁麻疹
hioh？=嗎
hông=被
揣著=找到
jiok=追
|
|
| ( 心情隨筆｜心靈 ) |
