字體：小 中 大 |
|
|
|
| 2022/07/26 11:03:10瀏覽165｜回應0｜推薦2 | |
2020.06.09寫 5.30-5.31
畚箕湖好𨑨迌
愛無礙協會開的同儕支援進階課程，開課的時因為厝裡另外有活動，所以我無去上課。
過無幾工通知我欲去阿里山上課，問我欲去否，有通耍，我當然袂錯過。
我hông分佇第2組，組長是日農。
干但知影這組決定坐阿里山火車去畚箕湖，佇石棹過暝。其他的討論，我攏無參與。
當咧歡喜欲去坐阿里山碰壁、胡蠅蠓仔死甲無半隻。(阮細漢的時攏按呢唸)，日農傳來訊息問我：車票買好未？
啥車票？
原來這遍出外，著學習處理家己的代誌，像買車票、決定三頓欲食啥等等。毋是像往過參加活動，有人共咱攢便便。著齁！這是上課，是欲學獨立，培養能力後擺通支援同儕。
因為我較晏加入群組，怹的車票攏買好矣，組員yueh-shao（原徹的太太、好跤的）教我上網訂票。
成十年毋捌網路訂火車票矣，阿里山又閣是另外一个鐵路訂票系統，過程一關閣一關，舞真久訂袂好勢，開始躊躇、敢欲去？閣想一下倒轉來，人若問我thài無參加，我敢會使講：「袂曉買票！」為著袂曉買車票來放棄？按呢m̄-tō足漏氣、足歹勢？
毋甘願，閣再上網試看覓。總算佇yueh-shao耐心一步一步教我的當中，順利去小7付款、提著票。
車票的問題解決矣，soah開始煩惱這幾日落袂停的大雨。照這个扮勢恐驚仔干但行出家門就有問題。
阿里山車班時間8:30 ，拍算騎車去車頭坐火車去嘉義，阮的雙手是生來欲舉枴仔的，袂曉舉雨傘，若落雨淋甲澹糊糊是欲按怎𨑨迌。
準若坐計程仔去車頭，落大雨嘛是會沃澹。閣再講欲紮輪椅出門，坐計程車著麻煩人扛上扛落，較無好勢。若騎機車，閣毋知欲囥佇佗。
斗六火車頭前驛停車場到火車頭的路敧一爿，家己捒輪椅會捒甲忝死，而且停車場離入口有夠遠，煩惱若像拍結虯的膨紗線，揣無結頭通tháu開。
當咧為停車煩惱的時。收著yueh-shao的訊息。伊講特別去後火車頭踅踅咧，揣著後站有一个新設的停車場，離車頭無遠。
真好！感謝yueh-shao，予我這个好消息，我就安心仔睏，等天光。
其實免等甲天光就精神矣。
按算欲坐6:50斗六往嘉義的火車，欲坐輪椅上車著較早到車頭，予工作人員有時間替咱攢上、落車的枋仔。
我毋捌停過機器服務的停車場。機車騎入去，機器予我一个若銅錢仔圓圓的代幣，才開門予我入去停車。停好，欲共輪椅對機車搬落來的時，好死毋死，輪椅卡死佇機車的架仔頂頭，按怎搝都搝袂落來。想欲麻煩過路人鬥相共，偏偏仔停車場無人出入，透早過路的人，毋是騎機車就是駛車，是欲佗揣人？
這聲，車班敢會赴？三舞四舞，嘛毋知按怎輪椅雄雄乖乖仔落車，予我會赴坐預定的車班。
咧耍的這兩工，三不五時仔若摸著揹仔內底彼塊代幣，淡薄仔煩惱，這塊代幣是欲按怎換我的機車轉來咧？！
去到車頭，原徹翁仔嘛來咧等車矣。有伴誠好！而且閣有真gâu照顧人，好跤的yueh-shao。
我悠遊卡內底偆的錢驚仔無夠用。儲值著參機器盤撋，這又閣是我的死穴。佳哉yueh-shao替我去處理。
火車到嘉義的時，離阿里山火車班猶有成點鐘。佇月台等對別所在來的同伴，陸陸續續到位。
兩組大約三十人左右。
我是第2組，車班較代先。第1組的車慢阮一班。
真歡喜，又閣坐起哩小火車。
離頂一遍去阿里山，已經十外年矣。
彼年sars疫情尾期，阿爸怹來斗六。阿爸講想欲坐一擺仔阿里山的火車看覓咧。我陪伴阿爸、阿母去北門坐火車上阿里山。會記得彼陣仔車廂內底是用柴裝飾的，這斗坐的這台火車，毋是柴的。
回想彼遍坐車，是温暖、快樂的。所以一直期待閣來坐一擺。
坐佇火車內，向佇月台等車第1組的朋友拽手講再會，雖然下一班車怹就綴來矣，阮佇車內假仙演一齣碼頭惜別。
火車佇北門頭一站歇睏，無偌久就聽著廣播：頭前山崩，為著安全咱的車無欲向前行。
原車倒退lu轉來嘉義火車頭。
阮雖然失望，但是想著連火車攏無坐起哩的第1組，阮就歹勢怨嘆。
坐一站的車程，車票全額退予阮，閣共阮講歹勢，啊！毋知欲按怎講這款心情。
無火車通坐去畚箕湖，阮這組我佮智玲學姐坐輪椅，若欲坐公車，起、落無方便，尾矣為著安全，決定包車。
運將人誠好，載阮到畚箕湖等阮兩點鐘予阮食晝了，閣載阮去茶雲居民宿，伊講疫情期間生理誠䆀，而且阮欲去茶雲居的頭家，是伊熟悉的，車資就俗俗仔算。
中晝時的畚箕湖咧落雨，無障礙設施無夠阮用，懸懸低低的地勢，四界澹漉漉的起崎、落崎，阮這群［共殘黨］行佇頂頭誠危險，只好定點歇睏。等較方便的同伴去買有名的畚箕湖飯包同齊食，食中晝配話，快樂濟濟。
當車停佇茶雲居民宿頭前，看著一个岑仔，我驚一下。這是幾何台輪椅欲佇遮出入的所在？按呢敢好。慢且驚，怹無障礙斜坡設佇建築物的正爿。
民宿頭家兩翁仔某人誠親切。看阮到位，就泡茶予逐个啉。
第1組因為選擇坐公車對嘉義去畚箕湖，較慢到位。阮啉茶了後，怹猶未轉來。早起真早起床，我是四點外就睏袂去，這時陣已經誠忝矣。選擇家己欲蹛的房間了後，參學姐想欲去睏一睏。後來無睏，兩人話濟甲若貓仔毛，講袂了。
因為武漢疫情影響，怹無開放營業。頭家是阮理事長的同窗，所以答應予阮入來遮過暝。頭家娘問阮住房需要按怎協助，才較方便。
我佮學姐用輪椅，兩人一間，怹搬一塊做甲誠四序的枋仔，khuè佇欲起哩眠床的所在，輪椅就會當自由出入。浴間仔有一个差不多三、四公分的戶橂，頭家娘來問，著需要啥物來幫助阮入去浴間仔。我請伊提兩塊細張椅仔，就會使得。
學姐已經坐輪椅幾何年。原本想講我兩塊椅仔就會使得，伊應該著閣較濟的輔助才會當入去浴間仔。
我錯嘍！
學姐竟然有才克服彼个戶橂，輪椅直接入去浴間仔。
太不可思議咧。
我想欲學這步，學姐教我按怎共頭前輪翹起來，人向後背……
會驚，驚tò-siàng-hiànn，仙學都學袂曉。
阿勳捌共我講，出外欲用輪椅代步，就愛先學會曉這招，若無會寸步難行。無毋著，我拄著戶橂，就是寸步難行。佳哉總是會揣著克服困難的方法。
看學姐輪椅liú-lia̍h出入浴間仔，問伊汰會曉翹孤輪？伊講厝裡就有這種環境。
這大概就是人講的：平靜的海面，無才調訓練出來優秀的行船人。
五點外，聽著組長喝煮暗頓。
頭家娘共灶跤借阮用。看灶跤徛真濟人，我坐輪椅無方便入去鬥相共，就佇餐廳等食。
暗頓的料大部份是組長日農款的，怹後生才國中爾，就有才調煎出來一盤媠媠媠的卵包，日農的太太佮三个囡仔攏來做志工，怹共囡仔教著誠好。
當阮這組暗頓已經食飽矣。第1組猶未到民宿。
聽講是理事長紮手搖車去畚箕湖，用手搖車轉來民宿。雖然六、七公里無偌遠，毋拘落雨，地勢閣崎，有人勸伊坐車就好。伊都堅持。天暗暗矣，怹才轉來到民宿食飯、歇睏。
聽講民宿6樓會當看著日出。
佇網路查日出時間，透早5:12分。
我決定欲起來看日出。少年時，阿里山公路拄開彼年，我參人來看一遍。雖然已經幾何十年，古早古早以前的代誌，我猶會記得當日頭跳出來彼个時刻的感動，徛佇邊仔一个阿桑khok-khok拜，面容虔誠，喙裡佛號直直唸。
手機仔寄倚5點。
我會認舖，便若出門攏睏袂沉。未4點就精神，驚6樓無人我毋敢遐早起哩，甲倚5點，6樓已經袂少人。
彼日無日出，阮等著媠媠的彩雲。
咱蹛台灣西爿，日頭是對海裡落去，攏講日頭落山，無講日頭落海？
理事長講［落海］意思無好。
聽伊按呢講，我才去想著［落海］另外一个意思。原來是按呢，毋拘，明明都落海！
第2工早起時佇民宿的大廳上課，分享各組的相片、影片佮感想。分享快樂，快樂加幾何倍。第1組無坐著火車，怹佇畚箕湖火車頭用輪椅，一台接一台，變做另外一種的火車。影片內底逐个耍甲笑哈哈，這比坐著火車閣較快樂敢毋是。
紮一粒快樂滿墘的心，轉來到後火車頭。我又閣想起來揹仔彼塊代幣…..。
佳哉，咱就是天公仔囝，總會有好心的人佇身軀邊。
落車了後，yueh-shao講：我參妳去停車場。伊教我用原底的代幣去繳錢，然後閣換另外一个代幣開停車場的門。
感謝yueh-shao，自出發、到活動結束，幫助我遮濟。
**
同儕=仝輩
hông=被
m̄-tō=不就
躊躇=猶豫
thài=怎麼
soah=竟然
敧=傾斜
忝死=累死
拍結虯=打結
tháu開＝解開
搝=拉
舞=折騰
gâu=善於
偆的=剩下的
綴=跟
khuè=
tò-siàng-hiànn=倒栽蔥
liú-lia̍h=敏捷
卵包=荷包蛋
khok-khok拜=不斷地拜
喙=嘴
𨑨迌=遊玩
|
|
| ( 心情隨筆｜心靈 ) |
