 
字體：小 中 大 |
|
|
|
| 2022/06/22 15:56:46瀏覽418｜回應3｜推薦19 | |
2020.04.26 連紲三工的［同儕支持員培訓］課程，講師除了落尾彼節課，其他攏是『身障者』來講課。較濟是龍骨受傷才變成『共殘黨』的講師。
第二日早起講課的趴趴老師，是肌肉萎縮的患者，有時陣需要鬥呼吸機來幫助伊喘氣較順，伊特別對台北落來雲林分享伊的經驗予阮聽。看伊遮呢無方便實在誠毋甘。
伊講若佇台北市，因為無障礙設施誠普遍，交通方便，佇台北伊想欲去佗就去佗，只是重度。若來到雲林，交通無方便，寸步難行，伊就變做極重度。
所以「只有障礙的環境，無障礙的人」。這句話徹著我的心肝頭。
若是任何所在我攏會當行到位，誰講我叫做『身障者』？
老師有出一个題目：若是醫療會當共你醫好，你敢欲？
我連想都無想，講：免！
若歲月倒退二十年，我的確會想欲做一个［正常人］。
今、偆的歲月無偌濟，何必著閣了時間去學做［正常人］咧。
第3工聽帥哥昭坤講師講，咱身障毋是因果、是使命。咱目前的使命，就是予所有的環境，攏成做通用設計。
我略略仔了解趴趴老師辛苦來回，原來是一份使命感。
細漢時總是予人講，咱跤袂行是因果。
課哪聽、想法哪翻轉。
以早若聽人講咱的袂行是因果，咱就有重重的罪惡感。想講我頂世人的確是用跤踏我的爸母？！
下課進前看著螢幕頂頭又閣是這幾日一直咧重複的三字［無障礙］。內心真激動。
這三字若從我細漢就出現，我的爸母就毋免為我操煩一世人啊。
人生一路行來，爸母在生的時，對袂行的我造成怹內心的虧欠，我一直攏知影。致使我若拄著因為袂行無順利，攏不忍心怨嘆，總是認定我家己無方便閣愛出門，毋著的是袂行的我，怨嘆定著加重爸母的不安。
離下課時間愈倚近，毋甘的情緒愈來愈厚，有一種畢業欲離開學校，從此孤單行的稀微。
理事長講，咱頂日仔手搖車去水林顏厝寮開台第一庄，上早來台灣開天地的，毋是顏思齊一个人爾。咱行佇建設無障礙環境，嘛袂當孤一人行。稀微，因為這句話成做燒烙的溫暖。
下課的時，足想欲大聲喝出來：阿爸、伊呀，我袂行真的毋是恁的錯誤，連因果嘛毋是。
透過上課，我參我內心的gāi-gio̍h（彆扭）和解。
爸母為我袂行，心情一世人的艱苦，毋知欲揣誰討？
已經做仙的爸毋，早就無計較曾經佇凡間，萬項無公平的對待矣。
感謝雲林愛無礙協會開這3工的課洗禮阮的內心。
感謝講課全程掛口罩的講師。
感謝這3日照顧阮的工作人員。
三工攏坐做伙的學姐妹妹，會共我sīng（寵）歹去。
＊是我仁愛的學姐、比我較少歲，所以是學姐妹妹。
伊佮我仝款，若是［林北跤好］，伊嘛bē-giàn（不要）哦！
|
|
| ( 心情隨筆｜心靈 ) |
