我叔伯阿嫂的第二查某囝，細漢時生做古錐得人疼，面仔膨皮紅霓〔ang5 ge5 紅潤〕，不管時一個面仔笑笑笑，唱著當時流行歌布袋戲，我叫伊達達仔、伊煞嘛叫我達達仔毋叫我阿姑。

算算咧離開故鄉嘛有三十幾年矣，故鄉的景緻，不管時道會走入我的夢中。無論是清水溝仔邊的柳樹、閘門跤種做籬笆的燈籃仔花、後壁宅仔的菝拉園、土地公廟邊仔彼遍開花真芳的檳榔樹．．無論夢回佗一景，總是感覺有一個囡仔綴佇我身邊，有時無歌聲、無形影，有時滿面笑容那跳那趒那唱歌，遐爾仔執著出現我的夢中，伊是誰？

頂年仔有一工我轉去故鄉，未看著伊，先佇走廊看著一個囡仔，彼個形影是遐爾熟悉，是伊，達達仔．．但是，三十幾年，伊敢抑未大漢？原來夢裡的囡仔是達達仔，即個囡仔是誰？啊．．．達達仔是伊阿娘。

人生啊人生，會當用佗一字來形容咧？敢是妙！

世事盤轉[輾轉]難相見，閣看著伊，已經是過了半個甲子。兩人雙手拫拫揪稠咧，千言萬語攏佇含淚的微笑裡。

伊講已經袂記得是幾歲，干礁會記得伊定定行來阮兜揣無我，人咧？人咧？干礁會曉想、袂曉問：「達達仔咧？」

離開三十外年，久久總會轉來故鄉行行、看看，真無拄好毋捌搪過伊，故鄉的模樣早道改變，不變的是夢裡的故鄉佮達達仔的形影，稠佇阮心肝。

做人的老母了後，對囡仔的關心佮疼愛，感覺有淡薄仔熟似熟似，才知，原來母性，佇我人生的少女時代，已經產生佇我的心內。

歡喜下一代的勇壯、成長，煞著愛面對長輩漸漸稀微的事實，這是參達達仔共款深刻的感受佮無奈。阮安呢想：人生雖然無奈，嘛是值得咱行一擺。尤其是佇參達達仔這段姑孫仔情。