是先熟似〔si̍k-sāi認識〕愛穿咖啡色衫仔褲的伊，才去學啉〔lim喝〕咖啡！

佇阮做學生彼的年代，歇寒〔hioh-kuânn寒假〕歇熱若會當參救國團舉辦的活動出去耍，就算是上精彩的假期嘍。

彼年歇熱，參加中部一團活動，伊規身軀咖啡色的穿插，佇燒沸沸的熱天時，看起來是赫爾深沉，不時佇衫仔的頂面浮出一搭一搭的汗跡，椆[tiâu附著]佇咖啡色的衫頂頭，未輸去硨倒咖啡仝款，使人印象深刻。

活動結束，參伊拄好坐仝班卜上[tsiūnn]北的火車，扑好車票佫成點鐘的時間，佮伊行入去一間冰果室，服務生提來的menu伊看都無看就講：一杯燒咖啡。

迹熱啉燒咖啡？無毋著！伊講熱天啉燒咖啡才知真滋味；彼是我人生的第一杯咖啡，彼間冰菓室的名到今〔kuà-tann到今〕猶原會記得：北極冰菓室。

轉去北部了後，市區的西門町、郊外的淡水河邊攏留落了參伊行過的跤跡，規個歇熱綴伊四界去揣咖啡的好味。我單單愛戀著無加糖、無加奶精的烏咖啡，燒燒的熱度、有一點仔苦澀、有一點仔甘味，參戀愛有共款的氣味！

熱戀的溫度佇畢業了後予現實捒去冷凍庫，一個冷冷寒天的下晡，伊點一杯冰咖啡，我猶原點著我的堅持。伊講怹兜家族企業參當時的我，伊序大人叫伊選擇一項，若選我、家族企業就無伊的名。．．．伊來共我講伊選擇做一個聽話的乖囝。

雖然寒天咖啡杯仔的熱度予人毋甘放手，心肝碎去的痛疼，無想欲閣講啥；越頭離開彼間號做「南美」的咖啡廳。

這敢是上天早道安排好的戲台？對熱天的「北極」沉落去的初戀、佇寒人的「南美」情路行到盡磅的死巷！

分手幾年了後，彼位咖啡色的查甫人，開著一台新簇簇的轎車來到阮兜；初戀回憶的呼喚予我答應參伊去淡水，揣舊時地重行一擺。佇車底，伊講現此時的伊，事業有成就、有車、有厝，干單欠一個女主人。我聽著感動甲強欲袂記得心內彼畷深深的傷痕；車快速向前駛行，行進中，伊伸手提前座置物箱內底的鐵罐仔咖啡，一打開啉予凋〔ta乾〕．．．．彼毋是伊啉咖啡的格調。

「請你佇下一個路口踅頭，我卜轉阮兜！」我用堅定冷靜的口氣安呢講。

佇險險仔閣跋落去愛情陷阱的時，予我醒起來的，毋但〔m̄-nā不但〕是伊手裡的鐵罐仔咖啡！

PS：即篇是以早寫華文時的入選作品，今改寫做台語文．．