熱天開的花，好親像黃色的開卡濟。

覆〔phak⁴〕佇人牆圍仔的軟枝黃蟬花，一蕊一蕊恬恬仔開，無心的花、有情意，目睭展甲大大蕊，阮行唯伊身邊過，連歹心的念頭都毋敢起，驚伊看迵阮的心。

一捾一捾像風鈴的阿伯勒，聽講伊叫黃金雨，花黃黃黃一大捾一大捾向塗跤津落去，有氣派閣大扮咧開花。車若無小心去停佇伊的樹仔跤，無外久伊道好心幫汝勘〔kham³〕一領黃色的車蓋[kua³]。

台灣欒〔luan⁵〕樹佇即時當出場，幼幼的黃花椆〔tiau⁵〕佇樹仔尾，頭一陣秋風若到，伊都會變魔術，媠衫一領一領一直展、上尾彼領是凋蔫〔ta¹ lian¹〕。

＊　　　　　＊　　　　　＊

予人參畢業聯想鬥陣的鳳凰樹，無參人時行〔流行〕穿黃衫，家己幔一領紅頭紗，送出畢業的學生一批閣一批。

鳳凰樹跤的記持，是幼幼的落葉。

國小三年時，教室後壁兩排鳳凰樹，樹頭大大大，兩個同學的手抱佇樹箍都牽袂著。

同學若出去朝會，長期顧教室的我，總是行倚窗仔邊，看一葉、一葉的鳳凰樹葉，飄飄落落來；日頭淪〔nng³ 穿透〕過樹枝，陪伴樹葉咧跳舞。

一擺我佇樹跤看樹影看甲入神，一個賣枝仔冰的人鐵馬仔騎倚，徛佇樹跤參我講話，看伊的冰桶頂頭，一時仔囝爾，落幾何葉的鳳凰樹葉。參伊講啥已經袂記得，干單會記得伊共我講：「汝跤無方便，愛認真讀冊，後擺則揣有好頭路．．．．」奚是我國校三年的歇熱，後來我離開田尾國校，到今，每擺看著鳳凰樹花紅帕帕，都去想著生分人對阮的鼓勵。

今日下晡，徛佇二樓看落去環保公園，一欉鳳凰樹孤孤單單，細細欉爾嘛開甲紅帕帕，親像咧共我講：汝定著是無認真讀冊，則會人生一路像干轆〔kan¹ lok⁸ 陀螺〕安呢一直踅、一直踅！