字體：小 中 大 |
|
|
|
| 2006/08/16 15:52:38瀏覽147｜回應4｜推薦8 | |
閣寫「越頭看」即個話題進前，有一點仔躊躇、有一點仔想卜覕；是居士的鼓勵，伊講寫即咧話題的意義，是卜予人知影佇即咧土地，曾經有一寡人，是按呢咧行人生的路，我則決定卜閣貼出來。 即擺轉去外家了後，我知影寫予人知，有另外一層的使命（按呢講若像傷沉重哦！）。 參阿爸講起致著小兒麻痺即咧話題，我則閣較深體會著父母承受外界誤解的痛苦，是赫呢深深傷害著殘障者的序大人。 阿爸講：「一寡仔人總是按呢講，咱是祖先仔痞積德、父母無捨施則會予汝致著即咧症頭，敢知影話安呢講出去，刺鑿佇心肝無地講的艱苦．．．。」 阿爸沈重的面容，委曲的表情予阮真毋甘。 阿母佇邊仔嘛講：「啊汝致著即咧症頭時，道啊無像出水珠時赫燒咧。彼早起像平時仔按呢倒佇眠床共汝飼奶，汝的跤煞無愛囥起來我的腹肚頂，我知影有各樣道緊去田裡問恁阿爸，隨帶去看醫生啊！見講講是阮予汝燒過頭，唉！啊知影那會安呢？」我知影，看醫生了後雖然我三暝三工無精神，但是閣有咧喘氣，阿母毋甘共我囥去塗跤裡，佇房間眠床一直等、一直等，咧等我精神．．．；阮若像看著阿母目屎一滴一滴．．．一直流、一直流．．．． 這寡話雖然我以早攏聽過，但是，毋捌有即擺迹呢毋甘，兩位八十幾歲的序大人，怹的生命自我致病就擔著我的苦難，心肝頭不管時像一粒秤錘矺稠咧，閣著長期擔著即款被誤解的痛苦。 面對年老父母沈重的表情，除了毋甘、我只好施奶笑笑共怹講：阿爸、伊呀，人阮即馬真有勇氣呢！便若有人閣烏白共我問講是發燒過頭，父母顧無好勢則會跛跤，我攏會問人：「恁的囡仔若是感冒，敢是恁顧無好勢？」毋是嘛，對否？是病菌佇不知不覺的時走入來身軀纏，等到發作時，發燒、流鼻水等等的症頭浮出來，奚道是感冒，食藥仔注射了後，好去矣，無痕無跡；啊若阮即咧症頭，病菌入來阮身軀的過程參感冒差不多是共款的啦，只是阮搪著的病菌較惡質，鑽入去阮的運動神經，損斷了了煞無法度復原，留落來的病尾綴阮一世人！ 看阿爸阿母憂頭結面咧談論我的雙跤，我只好閣激小丑仔共怹講：「共恁講哦！我若無跛腳，無的確我去做舞女，恁不管時嘛揣無我！」兩位老大人聽我按呢講，笑甲哈哈叫，阿母罵我：「三八！」哈！總算共怹弄予笑！ 人客倌，請恁斟酌看；飼著身體無方便的囝兒序細，無論是喙袂講話、跤袂行路抑是目睭看無的，阮；絕對毋是祖公仔無保庇、嘛毋是父母無施捨，干單會當講是天意；阮甘願接受！
阮參恁跤踏仝地、頭戴仝天，阮的父母參逐家的父母共款，對囝兒序細惜命命，卜那有罪？ 怹應該活佇「理直氣壯」的天地！ |
|
| ( 心情隨筆｜心靈 ) |
