七夕．情人節

(一)七夕

七夕拄過

回想以早的長輩，實在真本領

無故事冊，干單看著天星

就會凍講故事

細漢時熱人的暗頭仔

佇門口埕

坐踮椅橑聽大人講故事

牛郎織女的故事怹是按呢講：

牛郎的空課是看牛佮做穡

織女的空課是洗碗、煮飯佮織布

兩人相意愛

為著約會常在穡無做、碗無洗

玉帝受氣

卜處罰怹一禮拜則會當見一擺面

傳話的喜鵲共人傳毋著

講做一年則會當見一擺面

每一年卜相見進前

織女愛將碗洗好則會當去參牛郎見面

碗真濟，強卜袂赴去約會

那洗那急道哭出來

所以，每一年的七夕通常會落雨

奚是織女的目屎．．．．

後來，怹生四個囝

牛郎佮織女袂凍蹛〔tua3〕鬥陣

一人帶〔chua7〕兩個囝

暗時若好天，儋頭看銀河

牛郎星兩爿邊兩粒星、織女星面頭前兩粒星

奚是「牛郎帶囝在兩[liong2]爿、織女帶囝在面前」！

即款的故事，陪伴阮行過單純的囡仔時

（二）情人節

即一工

年歲六十捅的翁婿問牽手講

：「人少年仔時行今仔日送物件，汝愛啥我送汝？」

怹牽的講：「毋免！我卜挃的物件汝無才調送予我！」

翁婿講

：「講看咧！今〔tann1〕囡仔攏出頭矣．．．．．」

牽的講：「汝後擺莫對我大細聲，就是上好的禮物．．．」

這．．．汝敢允人否？