在晉朝時南陽庄跤有一個少年仔叫定伯，有一工天氣雄雄寒起來，怹阿母叫伊去市集買寡布通好做寒人的衫。

囡仔人愛耍，市集閣真遠，伊延路行延路耍，行到日頭落山猶佇半路裡。暗路煞去搪著一個鬼。伊問鬼講：「汝是誰人？」鬼講：「我是鬼！」鬼嘛問伊：「啊汝又閣是誰人？」定伯共鬼騙講：「我嘛是鬼。」鬼問伊：「汝欲去佗？」伊應講：「我卜去市集。」鬼講：「我嘛是卜去遐。」怹鬥陣行一段路了後，鬼講：「囡仔兄，汝行路有夠慢，我看按呢啦，我揹汝行一時矣、小等咧汝則閣揹我行一時矣，安呢較省氣力！」定伯講：「好啊！」

鬼先揹定伯行幾里路，鬼講：「汝那會迹重，汝確的毋是鬼吧？」定伯講：「我是新鬼，所以身軀較重啦！」即斗換定伯揹鬼，鬼一絲絲仔重量都無。怹輪來輪去互相揹向市集的路行去。定伯那行那問鬼：「大的、大的，我是新鬼，毋知影恁鬼的世界有啥乜禁忌？」鬼講：「阮哦！阮是啥乜攏毋驚啦！上驚人共阮吥嘴瀾！」講煞怹閣繼續行。

路裡拄著溪河，定伯叫鬼先過河，聽鬼潦水過河一點仔聲音都無。定伯過河煞共水潦甲嘩嘩叫。鬼問講：「為啥乜汝潦水有聲？」定伯講：「我拄死爾，是新鬼較袂曉過河，所以有聲，汝莫想傷濟！」得欲到市集的時，定伯共鬼囥佇肩胛頭掠著咧，鬼想欲落來，定伯共伊掠愈拫，鬼大聲喝咻，姑情共伊放落來。定伯無卜聽鬼的話，一直到到市集，鬼踜〔ling3〕一下落落去塗跤，一緊張煞變做一隻羊仔，定伯想著鬼講過鬼驚嘴瀾，緊共鬼吥一垺〔pu5〕嘴瀾，予鬼干單會當做羊仔！定伯道將羊仔賣掉。

人啊！評鬼較鬼。

鬼真單純，所以，咱道好好仔款待一年則出來一月日的鬼哦．．．