初次的反抗

　　去學校考試佮檢查身體無偌久，收著一張通知單，考試通過，但是愛去彼間檢查身體的病院手術跤佮做鐵鞋穿則會凍入學去讀冊。

　　手術？奚是愛用真濟時間佮金錢，我毋肯答應。

　　為著欲等小妹仔同齊讀冊，我已經慢人二、三年則入學，未讀冊進前逐年公所冊單若來，我就哭一睏、予阿爸罵一睏！

看著冊單就哭，參二姐彼張煞算，我哭掉幾落張冊單，二姊入學年歲夠彼年，我看著公所分落來叫二姊去讀冊的冊單，共伊攬咧哭，無愛逐工陪我的二姊去讀冊；阿爸看我慘聲哭，只好叫二姊慢一年讀，二姊無怨言；即馬想來我實在有夠鴨覆！

　　等真久則等著小妹仔的冊單入學，即時仁愛學校煞叫我著手術，若動手術上無嘛愛閣延遷〔ian5 chian5 延遲〕成年，打死我我都無願意。阿母干單會凍講：「汝即咧查某囡仔，迹毋聽話！」

　　其實講，跤生佇我的身軀頂頭，彼時我就知影，袂行的跤閣按怎手術，嘛是袂行，敢著閣去加討皮疼加開錢？阿母掠準我是驚疼，其實毋是；自會捌代誌以後，逐年過年進前，都是有人來厝裡討數，當我知影奚是因為醫治我的跤欠漢藥店的錢，我捌共阿爸講：跤醫無好，那會來討錢？阿爸講：「醫生無人做貿〔bua7　包〕的！看神生予人錢是應當的！」我無愛厝裡為我定定欠人的錢，所以嘛堅心毋去動手術。

欲去蹛校愛買一寡仔物件，親戚朋友知影阮兜散赤，欲募款予我去仁愛讀冊，阿母講毋好欠人人情赫呢濟，．．．阿母招一份會仔予我去讀仁愛，我知影阮厝無量剩錢通好予我手術；阿母講手術的錢伊會想辦法，我毋肯。規个歇熱欲等開學的日子，阿母想著就共我姑情我：「汝去手術好否？」我第一擺赫呢毋聽話，反抗阿母。阿母講：「已經轉學矣，若袂凍去讀欲按怎？」我講：「則閣轉倒轉來道好矣！」有人講我袂曉博儌〔puah8 kaiu2 賭博〕，見博博真大，敢有影？

　　我毋知影手術對別人的意義是啥？對我來講無重要！

經過時間的應證，人生路行到遮，我知影拒絕手術即層代誌是正確的；到今猶無看著手術了將拐仔掞掉的殘障者！

　　等夠家己出社會食頭路，一擺去做新的鐵鞋，頭家講欲介紹我去病院手術跤，伊講十捅萬就會凍完成手術．．．我應伊講：「即雙跤閣用無幾年，開即款錢啥意義？」

頭家應講：「行路會卡好看啊！」

穿一雙鐵鞋、舉兩支拐仔，若毋是早就將「好看」兩字掞掉，是欲按怎活落去咧？

 　　一向，我對阿母決定代誌真順從，單單欲入去仁愛讀冊彼時，一層代誌我無聽伊的話．．，彼是我有記持以來，初次的反抗。