報恩抑是討債

　　決定卜去讀仁愛學校的時，離報名截止的日期已經真倚〔wa2 靠近〕近，阮阿爸彼時人佇北部做空課，電話無普遍，聯絡的方式干單會凍用寫批；阿母袂赴〔be7 hu3 來不及〕參阿爸參詳，一位叔伯阿兄陪阿母參我鬥陣去仁愛學校報名考試佮接受身體檢查。

　　第一擺坐公車的我，眩車眩甲東西南北捎攏無。一入去到學校，觸目所見攏是參阮共款的殘障者，只是無甲一個人行路的姿勢相仝，每一個人有每一個人的行路方式，我看甲戇戇神神去。

　唉！宇宙當中若準講真正有主宰者，按呢製造即批殘障者，敢袂傷過厚工？成本敢袂傷大？每一位殘障者，凡勢攏參我共款承〔sin5 接受〕著阿母濟濟的目屎佮悲傷，阮一致著病道共厝裡的笑聲拊拊〔hu2 X擦拭〕掉，代替笑聲的，是親人的毋甘佮愁容滿面！天公伯仔那著按呢創治人咧？佳哉伊蹛佇懸懸懸的天頂，若無，不知會去予阮即寡仔殘障者父母所流的目屎淹甲走無路著否！

　　彼工佇學校筆試了後，隨由一位老師面試，後來我知影面試我的是詹老師。

　　伊問我講：「汝為啥乜卜來讀即間學校？」

　　我應伊講：「阮厝離學校足遠，所以我想卜來遮讀冊較方便！」

　　面試了後行出敎室，阿兄問我講面試考啥內容、我按怎回答。我將參詹老師的對答講予伊聽，伊講：「啊汝毋道講汝真合意即間學校．．．」　　啊！我都抑未捌即間學校咧，卜按怎講我合意？即款話我講袂出嘴。

　　阿兄參我共款，頭一擺看著共一個所在同齊出現迹濟殘障者，發起著慈悲心。伊共阮阿母講：「屘嬸！我後擺卜做醫生來醫怹的跤．．．」阿兄彼時的心願，是赫呢仔有愛心、赫呢仔有抱負、是赫呢仔使我感動；但是人生無常，阿兄後來並無做醫生，事業失志人失踪幾落十年矣，即馬嘛毋知流浪唯佗位！伊當初誠心的發願，我猶原銘感在心；希望伊現此時人平安過著快樂的日子。

　　學校考試了後隨去市內一間外科做身體檢查，候診的時，一寡本成無熟識的家長，因為共款搪著阮即款歹育飼的囡仔，互相咧講殘障囡仔帶著偌呢仔艱苦佮驚惶，逐家都有一部大大本的經通唸。

　　在座其中有一位老父講：「生阮即个囡仔進前，阮厝是敗甲賰棉積被無提去當爾；伊致〔ti3〕著即个症頭（小兒麻痺）了後，我做啥都賺錢，伊是來報恩的啦！！」

　　聽伊按呢講有人足欣羨的應講：「恁囝是來報恩的，阮的卻是來討債，開甲家伙凋疕疕．．．」

　　我是報恩抑是來討債？毋敢問。

　　我干單知影，無論我是來創啥，阿母總會共阮惜命命！

註：凋疕疕〔ta1 phi2 X〕：花光了家產