春來花自開

 我二十捅歲仔時，大姐厝邊一位做西裝的師傅，參我共款跤無方便，西裝店的頭家娘共師傅講欲安排兩人相對看，師傅應人講阮舉拐仔後擺驚袂曉帶囡仔。 

因為相親講無成，所以即層代誌真久以後大姐無小心才講出來，雖然人拒絕的理由是事實，伊無父無母，項項生活無人通鬥相共，安呢的顧慮是正確的，但是我腹腸較窄，內心感覺夆嫌的無歡喜。 

經過幾何年，我猶未嫁、伊猶未娶，伊邊仔的人閣共伊講起我，怹講阮阿母閣有法度鬥帶囡仔，即層代誌無啥好煩惱的。 

伊聽人按呢講，就去共阮姐夫打招呼，講伊按算欲約我出去。 

阮姐夫事先透露予我知，濟年前暗中予伊拒絕的往事浮起來心肝頭，因為按呢我無法度接受彼個人。 

後來伊的電話打來，我逐擺攏共伊講公司無閒愛加班。 

尾矣阮阿爸共我講：咱若無彼個意思，就講夆死心。 

阿爸順勢講：婚姻的代誌莫急，春來花自開．．．

 欲捧誰人兜的飯碗若像早就註好好。

 佇我年歲欲倚三十時，少我兩歲的小妹仔出嫁。

 蹛阮厝邊的化妝師美枝姐啊來幫伊化妝，才知影阮兜閣有我即咧老姑娘未嫁。

 無偌久，美枝姐來阮兜講欲共我做媒人，對方嘛是跤無方便。

我參查甫同學阿勳寫批已經寫幾落年，彼時寫得閣較真捷。

雖然參伊寫的批文，攏是日常生活的話題，阮私心對伊有感情的期待。

 不過，阮是查某囡仔，決定感情的方向阮袂使siunn大方。

 人欲做媒人時，阿爸問我敢有對象，阮內心對阿勳有期待，但是結果阮無把握，就應講無。

 阿爸講：若有想欲嫁，參人看覓咧，抑無一定愛嫁伊啊；若無，人若欲做媒人咱拒絕，外人會叫是咱無欲嫁，後擺若有適合的對象人煞無欲共咱報。

 相親的時，阮心內想著阿勳，想講汝即咧「呆頭鵝」，阮的心事汝掠攏無。佇心內無奈唸著雪山盟的字句：我只得葬身在無情海．．．

 相親了後，美枝姐講對方對阮有滿意，有意思欲參阮交往。每擺搪著美枝姐伊按呢共我講，我想講，是咧講客氣話，因為對方並無消息。

 阮參人相親了後無偌久，阿勳煞表達著招我同齊行人生路的意思．．．

 阮當然願意，但是．．．人阮查某囡仔人，愛較閉思咧，心內早就允伊，阮嘛無愛隨應好！

差不多過了成個月，接著相親對象的電話，共我會失禮，因為伊拄搪工廠搬厝真無閒，想講無閒一咧坎站則欲招我出去tshit-thô。

成個月的時日，阮的心情已經參進前差過千里遠，有肯定的感情對象，阮是無欲「葬身無情海」啦！婉轉拒絕，等待做阿勳的新娘。

 經過濟濟的波波折折，兩年了後，新娘車透早唯淡水載著阿勳佮我，行向一個新的人生旅途！

 阿爸向新娘車潑一碗水、阮唯車窗外掞出一隻葵扇．．．．

 風雨中的高速公路，車向南直行．．．．

 原來，一定有一個花園，肯收留阮即欉痞痞痞的花！

 春來花自開，我有真深的感受。