憂愁覕[bih4 躲]佇笑聲裡

　　佇阮歡喜期待當中，開學的日子來嘍！

　　阮卜出門進前，二姆去後背宅[theh8園]仔菝仔欉挽二粒上大粒的菝仔，囥落去包袱仔內底，伊講：這是專工去宅仔揣的菝仔，一定真好食。

阿姆像阿母安呢交待：愛乖乖聽人話、認真讀冊。

　　即時，大人已經無笑容，阮猶是歡喜期待一個新的生命驛站，袂曉啥乜是離別的憂愁、毋知大人的心情是難捨依依！

　　卜離開時，我干礁毋甘一個囡仔，伊道是阮叔伯阿嫂的第二查某囝，三、四歲的囡仔，我叫伊「達達仔」，伊嘛叫我「達達仔」。自伊出世到會行會走，我若有佇厝裡，大部份時間是參伊耍，阿嫂去田裡亦是佇灶跤無閒，我會幫伊顧囡仔，達達仔佇幾何個阿姑當中，上愛揣我。阿嫂雖然內內外外真無閒，但是真清氣相，中晝參暗頭仔攏會共達達仔洗身軀，伊若食飽、身軀洗好，道延路行延路唱布袋戲的歌來揣我佚陶。是一個快樂的查某囡仔。

　　聽講我離開了後，伊參伊阿母去田裡，手提兩枝柴仔，學我行路，喙裡叫「達達仔」，我知影抑未曉講出內心話的伊，像我咧思念伊安呢咧思念我。

　　我卜開學時，阿爸佇台北袂當陪我去學校，四伯的查某囝是我的叔伯小妹嘛致著小兒麻痺，伊照正常年歲讀冊，早我幾年去讀仁愛學校，我因為等細我兩歲的小妹仔同齊入學，所以叔伯小妹佇學校道變做我的學姊；四伯較知路，參阿母帶我去學校。

　　學校佇和美鎮的郊外，四箍輦轉看著的除了田園、嘛賰田園，離鬧熱的和美街路有一段路。遠遠看著學校孤單的建築物，若像一座野外的荒城！

　　報到、註冊．．．手續辦甲過晝，去學校餐廳卜食飯，煞賰一人額的菜，學校附近無人賣食的，愛去夠鎮內有較遠淡薄仔，我若卜出去愛閣倩車開錢閣無方便，所以，我食學校賰的唯一的彼份；四伯佮阿母出去和美街仔食中晝。

　　食飽了後，我佇寢室整理物件，寢室內底兩排大總舖，蹛二十幾個人，入門的正手爿隔一間細間房間，是照顧阮的一位上海姑娘郭老師住的。我的位佇入門倒手爿第二位，眠床位對去是郭老師的門，逐工透早伊一開門，第一個就是叫我「起床！找毒．．（啊！是早讀）」

　　我佇遐頭一個熟悉的人，是睏我隔壁床的學姊－淑美，伊是學校的舊學生，對學校的環境參老師佮同學攏真熟。伊一看著我，就笑微微參我打招呼。怹兜蹛佇學校近位仔的和美街仔，放假時怹阿爸會用歐兜麥來共伊載轉厝，是一位真親切佮真會曉照顧新學生的學姊。

　　阿母怹食晝了後轉來看我參學姊已經耍甲足熟悉，阿母的面有了笑容！佇生分的所在我迹緊就參人耍做伙，阿母道放心轉厝矣！

　　啊！彼時我佮阿母攏想未到，後來分開的日子，若是日頭欲落山的時陣，彼粒紅帕帕的日頭，都親像焚一桶燒滾滾的目屎，予阮逐工的目屎拭袂離！