最近逐工雷公熾爁〔sih4 na3閃電〕哮規下晡，是咧揣誰咧？揣迹濟工抑揣無！

以早蹛北部的時雷公無赫濟，會記得我拄來彼時是熱天，雷公像即幾工安呢哮。

自細漢到大漢我身邊毋捌無人做伴，嫁，人講是揣著伴，道抑無影！

彼下晡厝干礁我一人，大大的雨、光光的熾爁、震動玻璃窗的雷公，我驚甲共房間門鎖咧、棉被掩咧、耳仔塞咧，規身軀汗閣毋敢共棉被翻掉。即時阮舊時的同學煞打電話來相揣，問我咧創啥？我講佇棉被內底咧覕雷公．予伊共我笑足久的。

阮阿爸講我是串驚串著，伊講我拄好是嫁來佇雷公窟的附近。

伊講佇林內參竹山交界的清水溪遐，是生雷公仔囝的所在，雷公是佇遐發出來的．．．．敢有影？阿爸講：抑知的．．，道有人安呢傳說。

阿母講我驚雷公是遺傳著阮外祖，伊講阮外祖便若是聽著雷公的聲，道走去灶跤大灶前踞〔ku1 躲〕咧，驚甲疲疲掣〔phi5 phi5 chuah4 發抖〕！

有一段時間我咧走外務，定愛開車去竹山彼區收空課轉來做，一擺轉來時搪著大雷雨，佇南雲大橋竹山彼爿看唯林內即爿，看唯阮阿爸講的彼咧雷公窟，真的咧，雷公一隻一隻唯遐闖起哩天頂，熾爁有的淡薄仔青色、有的細細條的紅色，一條一條衝唯天頂雲裡去．．．．我看一下煞毋知通驚。佇遐停一睏仔等雨較細則閣勻勻仔共車駛過南雲大橋轉來。

即馬，我較毋驚雷公矣，的確是阮囝細漢時，伊若咧驚雷公，我道共伊講：免驚、免驚．．．．講甲尾矣，家己嘛免驚。

頂工黃昏載囡仔去怹學校，雨仔幼幼、雷公佇遠遠的所在發光，囡仔講：媽敢袂驚？

我講：袂咧！閣感覺真愛看。

驚，會遺傳、嘛會使訓練予驚走去覕！

有一種驚毋是遺傳的，是因為．．．．

我來講有一位做人翁婿的人愛博儌〔puah8 kiau2 賭博〕的代誌，一擺怹某來掠，明明道知影有咧博，偏偏仔無證無據掠袂著。伊共怹某咒誓〔ciu3 cua7 發誓〕講：我若有博道去予雷公摃！

赫拄好，第二工真正有雷公熾爁，彼個人面仔青筍筍覕入去厝裡毋敢講半句話！