2015.10.13寫

今仔日tī讀冊會kā chhiūⁿ-chúi【上水】這个詞抾倒轉來。

會記得彼是阿姐讀國小ê時，我猶未讀冊。

逐早起，大姐著捧規家伙仔8个人ê衫仔褲，去鼓井跤洗好，才會使去學校。

寒人的井水是冷吱吱、熱人ê透早，鼓井邊是蠓bui仔【很小隻的蚊子】一大堆，阿姐khû佇鼓井跤洗衫兼飼蠓，逐遍轉來，遍身攏是蠓仔叮著ê痕跡，真可憐，伊是大查仔囝，小弟小妹一大搣，伊著分擔阿母ê工課。誠辛苦！

鼓井，從我會捌，伊就飼阮內底七戶人家。

彼个年代，若無鼓井毋知欲按怎過日子。

食、是食井水。洗、是用井水。

熱人閣會凍共西瓜沉落去鼓井底浸浸咧，沽起來剖西瓜，是彼个年代真大ê享受。

是講、嘛捌聽著厭世跳井ê代誌。

有時陣會想講，阮實在是好狗運。若毋是後來有水道水，我是無可能成做人ê家後、做人阿娘。

因為舉枴仔...是欲按怎捾水桶仔去鼓井上水轉來煮食、洗盪咧？

抾著一个詞...歡喜甲！欲來去睏矣。

看會眠夢故鄉彼个鼓井bò；晚安！