用真緊的速度共飯煮好、衫洗好，欲較早歇睏咧。

會記得有一个漢醫教我，若是開始發燒的時，啉一碗仔燒湯（鹹的），棉被om（蓋）咧睏予流汗tō會共燒teh落。
 

一碗みそしる【味噌湯】啉了，看著桌頂有細粒トマト【小番茄】，這種水果有ビタミン【維他命】，對感冒的症頭有改善的效果，就搣幾粒仔來食。閣泡一杯Ｃ粉【粉狀維他命Ｃ】啉落去，想講按呢絕對妥當矣，睏一睏- -矣，感冒就會離我遠遠遠。

欲睏進前，鼻仔袂通，kiu（縮）佇被底真久才睏去，過成點鐘，煞予腹肚疼吵精神；彼種疼，若像有人攑一支針佇腹度內底huê咧、huê咧，疼甲流凊汗，汗一流，發燒的感覺顛倒好去矣。

腹肚疼→走便所→轉來om棉被等鼻仔通→睏去；……腹肚疼→走便所→轉來om棉被等鼻仔通→睏去。
 

唯半暝仔11點外到透早6點外，毋知repeat【重複】幾遍。其中有幾何遍，疼甲想欲走急診，兩、三年前捌假日送阿勳去急診的經驗，雲林台大講，醫生無閒，毋知當時才會當處理；去成大，嘛講醫生跤手無夠，上緊愛等2等鐘。想想咧，猶是佇厝裡走便所較方便。
 

阿勳tsîng (從)彼年làu-sái【拉肚子】住院，嚴重甲轉院去台北，好去了後，阮阿爸講阿勳去予làu-sái兩字驚著，伊身邊不管時有làu-sái藥仔，毋知囥佇佗，伊助眠的藥仔食落，呼吸聲重重，就是已經睏落眠矣，若共叫起來，恐驚仔嘛分袂清楚佗一粒是làu-sái藥仔。這就是平時仔無咧關心伊的結果啦！
 

想著034【靈山寺】的師父捌講：平時佛弟子就要經常去思考身體佗一部份是自己會當控制的？若攏無法度控制，何必著共伊當做是家己的？

我試用這个信念，嘛佇真疼的時陣想溫暖的往事。都ah予我擋甲透早6點外仔，伊精神矣！問我有較好否。
我講我一暗睏無好勢，汝攏毋知hoⁿ？
講干單知影我出出入入毋知咧無閒啥。
 

伊去提一粒làu-sái藥仔予我食落去，伊有代誌愛出門。
彼粒藥仔有效，毋拘一暝睏無好勢，無體力上班。
LINE予同事交代我請假，了後繼續睏！

睏著一直夢、一直夢；夢見厝裡的親人…..

精神；又閣想起腹肚疼的往事；
國校仔5年歇熱一个下晡時，腹肚疼甲倒佇塗跤兜唉，阿爸去西藥房買濟眾水予我啉，無效！第二工才知…..是初經、經疼！

此後、每一個月著疼一遍。

到甲上班彼个年歲，有時煞疼甲無才調出門；早起時阿爸若看我倒佇眠床無上班，就去西藥房提止疼劑予我食。彼時真戇，袂曉買寡仔起來囥，予阿爸按呢定定走西藥房….

有聽講經疼結婚就會好；偏偏仔本姑娘到三十外歲才嫁- -人！加疼真濟年，有夠冤枉。
 

倚晝阿勳轉來矣，叫我去予醫生看。
 

共症頭講予醫生聽，應講：莫煩惱！我提藥仔予汝食就會好去！
聽醫生按呢講，若像好一半較加矣！

我閣共醫生講：嚨喉嘛疼、骨頭嘛酸、鼻仔嘛袂通……！橫直身軀有感覺的所在，攏咧艱苦。

醫生講這是胃腸型的感冒，咱共腹肚疼先處理好勢，才閣醫別項，若欲處理嚨喉，腹肚疼就袂好。一遍袂當處理兩項，按呢汝知否？
知…………！

聽醫生的話，藥仔提轉來認真食。
腹肚疼好去，其他的症頭嘛慢慢仔無去矣。
 

請假工半，連拜六、禮拜，攏總歇三工半。

來到停車場，看著雨傘樹佇綿綿仔雨當中，佔領起來伊的一片天。

植物哪會遮勇敢？無論日時曝日、暝時凍露、酸風吹、冷雨沃，伊都袂感冒！

內心輕輕仔哼唱昔日詩人葬花，惜花蕊的詩句，佇看著青青青樹葉的這時陣！