聽我按呢問，伊應無。共我講來的時，看著虎尾平和橋附近，有指示牌仔三公里遠的所在，會當欣賞［屋頂上的貓］。

好哦！佇網路看人貼相片，彼貓有夠古錐，真早就想欲去看覓，講行就行！

妙惠佇仁愛學校讀冊的時，減我一屆，彼時參我攏是合唱團的團員，伊舊年加入一團亂，是離開仁愛30外年了後，閣再齊聲唱歌；真快樂！
  

欲離開餐廳的時，阿娟問阮欲去佗？共講欲去看貓。

阿娟蹛虎尾，對附近的景點真熟，叫阮毋免閣倒轉去平和橋揣貓仔，建議阮對餐廳正手爿彼條路去較近！

我參妙惠攏蹛斗六，今仔日才知；路痴正頭兩个平仔重。

往阿娟講的方向直衝.....衝、衝、衝！毋著咧....哪會往【吳厝】。佇虎尾出入遮濟年，看著【吳厝】，我略略仔知影彼是往西螺、毋是阮欲去的所在。

參妙惠佇青紅燈跤討論的結果；欲返頭倒轉去行平和橋彼條路。

返頭、順續斡入去加油站加油。
問加油站的人：欲看貓愛按怎行？
報阮閣返頭，無偌遠青紅燈遐正斡......！ 
  

照人報的路，斡入去才看著欲去阿娟怹兜熟悉熟悉的路；著啦！阿娟講愛經過怹兜外圍彼條路，早陣騎過頭才會揣無。
問妙惠：這方向著hoⁿ？
講無毋著。

機車騎真久，攏無看著貓的指示牌仔。

內心有淡薄仔憢疑，毋是講正斡無偌久就會到？庄跤路、［無偌遠］的意思無一定是［無偌遠］哦！

內心當咧不安的時，看著頭前阿娟予怹翁婿朱哥載，停佇路邊等阮，問阮是踅對佗去？

哈...原來怹驚阮兩个路痴紡見去【走失】，一路追來欲tshuā【帶】阮去揣貓。
實在予人真感動。報路、報甲到位。
  

斡入去傳說中［屋頂上的貓］彼个所在....一條細細條的路仔，全精神咧閃車，因為路邊停滿車輛，遊客一个接過一个一直行過來，袂少賣食物的擔仔中間，閣有一台一台的車經過....真無簡單來到一个較無人的所在，就是壁頂畫一隻大隻貓倒佇遐彼位，當欲放鬆心情欣賞［貓］，朱哥講：無矣！到遮爾，閣落去無矣？
啥貨？網路的相片，敢毋是足濟的？哪會干單看著一隻？
啊！我的目睭無閒咧閃車、無看著貓啦！ 

怹問講無..敢欲閣重行一遍？無愛！路細條、人佮車閣遐濟，行著壓力真大。 
 
阿娟怹翁仔某做頭前，欲tshuā【帶】阮去揣往斗六的路；我看著無偌遠起佇田中央彼間持法寺，招妙惠來去看看咧，共阿娟講續落阮家己行矣，恁轉去歇睏。怹袂放心，猶是參阮去持法寺。

持法寺拄起好無偌久，我來過。會記得彼時樓梯岑仔猶未做好，真歹行，彼遍來的時體力猶袂bái【不錯】，入去參觀內底的建築，真有特色，印像誠深，所以想欲閣去看一遍。
  

一到位，看著樓梯做甲真平、真勇的款式；毋拘、無設扶手。
妙惠講：無咱來去廟的後壁看有斜坡通起哩無。
我知影一定無。
就決定離開......對行動無方便的人無友善的所在！
  

阿娟怹閣再一遍報往斗六的路，確定阮袂行毋著了後，才離開。...真感謝阿娟佮朱哥這對善心的【朱氐夫妻】，對待人客遮爾仔熱心。
  

紮著怹的熱情；雖然［貓］看無著、雖然［廟］peh袂起哩。
一路看著闊莽莽的田洋，嘛是予阮心情真爽快！
2015-02-01