中晝歇睏的時，機車騎出辦公大樓前咧等欲過大路。

一个騎機車、身穿紅衫仔的阿桑騎倚問：「汝敢知影ＸＸ國中按怎行。」

：「啊就佇汝拄騎過來彼个青紅燈遐。」

伊斡頭看伊行來的路，憢疑的面容，我想伊大概袂記得伊按怎來的。

：「汝就返頭，騎甲青紅燈跤，看過去就是矣。」

伊無欲返頭的款式。

我問講：「按呢汝敢知影？」

應講：「嘛是毌知呢。」

日頭足iām，閣佇日頭跤停落去，我會溶去。

：「我tshuā汝行！」

這是上直接報路的方式。

伊真歡喜講：「多謝啦、予汝真麻煩。」

袂麻煩啦，若參我平時仔咧行的路線，我干單是加斡幾个彎、加等幾个仔青紅燈爾。

騎到青紅燈跤，報伊看：「彼是校門、這是怹的活動中心。門口有守衛仔，汝欲揣人會使共問」

伊煞應講：「我毋是欲揣這間學校啦，聽講伊附近有一間精武堂。啊汝敢知彼佇佗？」

hăⁿ？？？