『起凊瘼』這个症頭佇我人生每一个階段總是無欲缺席。

細漢時，有時鼻著阿爸買青蚵仔轉來、有時食著參有冬蝦的食物、有時是無代無誌，身軀就起一泡一泡紅吱吱、癢甲欲死。

細漢的時症頭若發作，阿爸鐵馬仔騎咧載我去診所注一支射就隨好去；蹛學校的時症頭若發作，司機黃先生會用校車載我去注射，後來傷捷發作，司機先生換用機車載我去注射，因為一个人坐一台校車有較浪費。

結婚了拄有身彼個月，這个症頭想欲來操練一个新腳數老母的偉大佇佗，he是上蓋為難我的一擺；因為有身，驚傷著腹肚底的囡仔，毋敢注射、毋敢食藥仔。癢起來就用阿母教我的方法，米酒隔水煮予燒，抺佇癢癢的所在略略仔止癢一下，忍耐是唯一的一帖藥方。佳哉個外月了後這个症頭就放我煞。

囡仔離跤手了後，重新行入職場初期，大概壓力傷大，過敏發作了注射佮藥仔攏矺袂落下，變做慢性皮膚過敏，到處去揣醫生，唯有牌的皮膚科、揣甲無牌的密醫仔，藥仔食甲人大箍、心情餒志。拖半年外，袂記得按怎好去的。

年歲愈來愈濟，這个症頭發作嘛愈來愈痞對付。毋知自當時開始，注射無效、藥仔食甲人sian7篤篤，閣往往會引起其他的症頭。佳哉頂年仔予我揣著一位中醫師，藥仔有耐心逗逗仔食，三兩工略略仔消褪、四五工就會漸漸仔好去。

我掠準無論起凊瘼按怎凌遲，我攏忍會過。

仙想都想袂到，這个症頭會當甲我舞甲半暝仔走急診。

彼工早起時起床就略略仔發作，下晡下班去看中醫，想講像以早按呢，中藥加忍耐一味，一定會過去。

照醫生的吩咐食藥仔、癢就忍耐。

彼暗十點外，房間冷氣放予冷冷冷，想欲用冷來趕走規身軀的癢。

除了面、規身軀攏紅、癢。倒一時仔，手真無閒一直jiàu【抓】，長躼躼的暝，敢欲按呢一暝jiàu甲天光？看是無才調入眠、無才調參伊和平共處，萬箭鑿佇身軀頂頭的痛苦，量苦毋通閣忍耐。

冷氣關掉，衝落去樓跤，共拄欲去睏的阿勳講我欲去掛急診。

伊欲參我去。

毋拘伊暝時睏眠障礙的症頭，有咧用鎮靜劑，這時陣已經食落腹矣。

共伊講我家己去就好。伊講袂放心我家己去。我講無你藥仔若發作，我毋就閣顧一個愛睏愛睏的你？

我知影我家己有法度照顧我家己。請伊安心佇厝裡等我電話。伊勉強答應。

＊　　＊　　＊　

醫生一看著我的手盤，問我哪會囥甲遮嚴重？有人會擋袂牢呢。我講我叫是我有法度忍耐咧。就是擋袂牢才走來急診。

注射是上緊的方法，毋拘愛有厝裡的人陪伴醫生才肯幫我注射。

我講阮翁婿助眠的鎮靜劑拄食落，敢通叫伊開車過來？

醫生講按呢無妥當。叫我欲轉去的時除非有人載、若無就坐計程仔轉去。

這時陣誰有法度來載我？半暝三更坐計程仔...哎～真正是為難我啊。

醫生啊～足癢的呢，先幫我注射，轉去的問題我才閣想辦法好否？

兩支血筋的射sak落下去，規身軀有夠爽快隨袂癢。

毋拘才無幾秒鐘，心肝頭tsat-tsat強欲袂喘氣。共護士小姐講了、人就無力，目睭皮peh袂開。聽著護士小姐咧喝：幫我sak一台病床、家屬咧？

我細聲應講：家己來的！

予人扶起咧病床了後，有聽著醫生講：幫你注一支點滴，等一下幫你sak去做心電圖檢查心臟。

點滴注落下了後無偌久，心肝頭的tsat-tsat有改善，足想欲睏。

眠眠仔、靜靜聽急診室內底的人生百樣；有酒痟的人咧茹工作人員；有往生的家屬佇急診室互相責備對方、推卸責任；有一个無父母佇身邊照顧的囡仔燒袂褪，怹老爸打電話入來，人叫伊免過來。

後來沉落去深深的睏眠，聲音遠離矣、艱苦褪去矣、無病疼的感覺，有接近天國的平靜。若是這時來離開，應該是袂bai2。

這種接近天國的感覺佇剖腹生囡仔的時捌有過。

二十幾年前生囡仔彼工是寒人，台北的寒天又閣寒又閣濕。

透早八點外予人sak入去手術房。干單穿一領病院提供薄釐絲的無菌衫，寒甲袂曉講話，負責動刀的王醫師一入手術房彼句：今仔日上寒。加倍我寒的感覺。

共醫生講我真寒。伊講連鞭就燒矣。

有影、麻醉醫師叫我深呼吸。都才吸猶未吐氣咧，規身軀溫暖爽快馬上睏去矣。

毋知經過偌久，佇我的感覺是拄才睏去爾，睏甲足四是，想欲一直睏去莫精神嘛好，去天國大概就是這个感覺吧？

毋拘護士小姐無愛予我睏，唯我的面一直拍：翠苓、你囡仔生落來矣，精神啦！

啊！？著哦。我愛起來照顧囡仔，我是有囡子愛晟的媽媽啊。

甜蜜的牽掛予我有力頭唯深沉的國度peh起來

後來阿母共我講，11點外就叫家屬去恢復室外口等，一直等甲中晝點外才看著我，予伊真煩惱。

啊！真歹勢。佇阿母歡喜做外媽的時，閣予伊煩惱我；佳哉我有倒轉來。

＊　　＊　　＊　

佇我感覺接近天國平靜氣氛的時。

：「我哪會放心放你家己去急診？！」翁婿著急的聲、憂愁的面佇腦海中一再出現。

這時我若來離開，伊除了失伴的寂寞、大概會有深深的虧欠，我毋好造成伊的遺憾啊。

甜蜜的牽掛又閣一擺予我唯深沉的國度倒轉來矣。